Marseille-a kir tum lo Drogba

Ivory Coast striker Didier Drog­ba chuan season thara a club hlui Marseille lam pan tur anga an sawi chu phain Ligue 1 club-ah hian kir tumna a neih loh thu a sawi.

Kum 37-a upa Drogba hi Chel­sea-a a contract neihlai a hman zawh avangin a duh lam club a pan thei. A kum a tam tawh avangin sum tamna lam hawi mai tur anga sawina pawh a ri ring hle.

Mahse, kum 2012-a kar khata £200,000 hlawh tura Chinese Super League club Shanghai Shenhua pantu chuan, "Ka tan chuan sum hi buaina ber a ni lo a, ka buaina zawk chu club-in enge tum an neih tih hi a ni. Ka ngaihdan chuan Marseille hian trophy chawi tumna an nei lo a, an player neih ṭhat ber ber Andre Ayew, Andre-Pierre Gignac leh midang an chhuah tir nual bawk a ni," a ti.