Anfield-a Firmino luh vangin Hamann a lawm
Liverpool midfielder hlui Dietmar Hamann chuan Reds-in Bundesliga club Hoffenheim aṭanga Roberto Firmino an la lut thei chu lawmawm a tih thu sawiin, Brazilian midfielder chuan Anfield-ah buaina a neih a rin loh thu a sawi.
Germany midfielder pawimawh ṭhin chuan, "Firmino inkhel hi vawi tam tak ka lo en tawh a, ka player duh ber te zinga mi a ni. Brazilian nimah se Germany-ah hun rei tak chhung a inkhel tawh a, a hmasawn chak dan hian ka mit a la em em a ni," a ti.
Liverpool a cham laia FA Cup, League Cup, UEFA Cup leh Champions League-te chawi tu Hamann chuan, "Firmino lo khelhpui tawh ṭhin player-te ka kawm nual a, tuman England-a a talbuai an ring lo. Ball a thiam mai bakah a chak ṭhain a rilru puthmang a dik a, Premier League-a hlawhtling turin theihna a nei a ni," a ti.
Firmino manah hian Liverpool chuan pound maktaduai 29 vel an in seng a, Hamann chuan Firmino thiamna leh theihna enin Reds ho sum sen zat hi tam a ti lo.
Kum 41-a upa Bayern Munich tan pawha lo khel tawh chuan, "Firmino man atana Liverpool insenna zat hian min tibuai lo. Brazil international hmalam hun eng tak nei a ni a, Brazil star ni thei tur khawpa theihna nei a nih avangin a man atana Reds ho sum sen zat hi a tam lo a ni," a ti.
Hamann chuan sawi chhunzawmin, "Club dang sum insen zat hi en ila, player ṭha leh thiam la lut tur chuan sum sen inhuam ve deuh a ngai a ni. Liverpool hian Sterling mana pound maktaduai 50 hlawhchhuaka chumi aṭanga Firmino an lei a nih chuan sumdawnna ṭha tak an kalpui angah ka ngai. Dik taka sawi chuan Champions League khel lo tur Liverpool-in a ni ang player an lak luh theih ka beisei lo. Mahse, Firmino-a'n Liverpool a pan hian player langsar pahnih emaw pathum talin Anfield lam an pan leh dawn tih a tilang chiangin ka hria," a ti.