Premier League lama pem tum Turan
Atletico Madrid midfielder ṭangkai Arda Turan chuan Premier League lam hawi a tum niin a agent Ahmet Bulut chuan a sawi.
Kum 28-a upa midfielder hian Diego Simeone enkawlna hnuaiah Atletico Madrid-ah hmun pawimawh tak chang mah se chona thar hmachhawn a duh niin a agent chuan a sawi a ni.
Manchester United, Liverpool leh Paris-Saint Germain ten an rim mek anga an sawi Turan-a agent Bulut chuan, "Tun nipuiah ngei hian Spain chhuahsan a duh a, Premier League-a chona thar hmachhawn hi a duh a ni. Atletico hian a man atan euro maktaduai 41 lai an chhiar avangin Madrid khawpui chhuahsan hi a awlsam dawn lo. Tunah hian an hming tarlan remchang lo England leh Europe a club lian tak tak pathum nen inbiakna kalpui mek a ni," a ti.
Bulut chuan Turkey international Turan-a'n Premier League pan a chak thu sawiin, "PSG leh AC Milan te pawn min dawr a, Champions League khel lo tur Milan-ah hi chuan kan kal ka ring lo. PSG-ah hian kal theihna chance ṭha tak awm mah se amah ber hian England-a khelh hi a chak tlat a ni," tiin Turan chuan Premier League lam a hawi thu a sawi.