Arsenal an buai lo

Mikel Arteta-a'n a player ṭha ṭhenkhat hahchawlhtir mah se buaina an nei lo - Arsenal hian Girona chu 3-1 a hnehin Champions League knockout stage atana an dinhmun an ti chiang.

Gunners hi last 16 lut chiang tawh an ni a, playoff khelh ngai lo tur pawhin goal riat aia tama tlawm loh a tawk, an dinhmun a ṭhat sa avangin La Liga club lakah an indahṭha thei a ni.

Nilaini zan khan Estadi Municipal de Montilivi-ah captain Martin Odegaard hoin an inlan a, goalkeeper David Raya erawh hliam vangin a khel thei lo - si ban nghaktu Neto chuan holam angreng takin goal a chhuah.

Minute 28-naah Girona lamin an nawr let thut a, defender Juanpe chuan a karawl hmu fuhin ball a lir lut a, goalkeeper Neto a lo chhuah hma bawk si avangin Arnaut Danjuma chuan mawi zetin a pet kum lut.

Goal an chhuah aṭanga minute 10 hnuah Thomas Partey chuan penalty a hlawh chhuak a, a pet tura rawn ding chhuak Jorginho chuan a hlah lo, chawlhlawk hmain Ethan Nwaneri a inlar bawk.

Kum 17 mi Ethan Nwaneri hian Leandro Trossard-a ball pek chu box hrulah a tlan pui a, amah vengtu awm nual mah se goal kil lamah a pet thut a, mawi takin 2-1 a an chakna goal a khung.

North London club manager Arteta chuan, "Hnehna chang chung ngeia a hmawr bawk kha kan duh, boruak ṭha tak nei chunga kan khar thei kha ka lawm. Hliam kan neih belh lo a, ngelnghet taka khel chhunzawm kan tum ang," a ti.

Arsenal hian Pathianni zanah Premier League khel turin Manchester City an mikhual zui leh nghal dawn. Hmahruaitu Liverpool nen an inkar a zau deuh tawh a, league nomawi an beiseina ti nung chhunzawm turin tlawm a thiang lo.