Silvan-a inlan dawn

38th National Games neih laiah, vawiin chawhma dar 10:30 bawrah hian Mizoram aiawh a feh chhuak MH Silvan Beihrothatlo a inlan dawn, midang pahnih erawh February 1, Inrinniah an inlan thung ang.

Siaha tlangval Silvan-a hi 67kg huangah a inlan dawn. Qualifying khelh lai khan Silvan hi 10-na a ni a, inelna hmachhawn thei zingah a tel lo. Mahse, Services aiawha tel tur Jeremy Lalrinnunga leh Punjab aiawh tur pakhat chu hliam vangin an inlan thei lo a, hmun ruakah Silvan hi koh leh a ni.

Mizoram aiawh hian weightlifting bikah Silvan bakah - Lalruatfela, Bungzung/NCOE Patiala chu 89kg huangah a inlan dawn; Lalchhanhimi, Khawzawl/SSB, Delhi chu 71kg huangah a khel thung ang.

National Games hnuhnung zawkah khan Mizoram hmingin Lalhunthara chuan 67kg huangah gold medal a la, tun ṭumah erawh Services aiawhin a inlan dawn thung a, 73kg huangah a khel thung tawh dawn a ni.