Real Madrid an chak nuamsa

Brest khelmualah Real Madrid-in harsatna nei loin goal thum an khung a, an lamah a luh ve loh avangin 3-0 in an chak - Carlo Ancelotti naute hian hnehna chang mah se, last 16 erawh direct-in an lut nghal thei lo.

Real tan Rodrygo chuan goal hnih khungin, Jude Bellingham chuan goal khat a thawh ve bawk a, beisei phak baka Champions League season hmangtu Brest-in Real an tawn meuh chuan a chhanletna tur an nei lo. Mahse, French club pawh hian playoff an khel ve tho ang.

Guingamp khawpuia inkhelah game boruak a 'hot' lawk lo. Mahse, minute 27-naah Rodrygo inlarin, goal tawih a khung - Brest lam hian Ludovic Ajorque hmangin si phurh an sutah an ngai a, mahse, video assistant referee hmanga ennawn niin, offside vangin pawm a ni lo.

Real-in first half-ah goal khat chiah an khung a, second half-ah goal hnih an khung - Bellingham chuan minute 56-naah belhchhahin, Rodrygo-a'n minute 78-naah an goal thumna a khung a, Real an chak.

Madrid chak mah se Bayer Leverkusen, Lille leh Aston Villa ten hnehna an chan ve avangin top 8 an ni phak lo a, last 16 luh tuma playoff an hmachhawn a ṭul dawn.

Real hian UCL-a an match hmasa pangaah vawi hnih chiah hnehna an chang a, match hnuhnung pathumah an chak vek thung. Player langsar Vinicius Jr, Kylian Mbappe, Jude Bellingham leh Rodrygo te an 'form' vek a, champion an beisei ngam leh tawh ang.

Hrem vanga Brest laka inlan lo Vini hian tun season-ah match 26 khela goal 16 khungin, assist vawi 10 a nei. Season ṭantira sawisel hlawh Mbappe pawhin match 32-ah goal 21 khungin, assist vawi thum a nei.

Bellingham pawhin a theihna tak tak a pholang leh ṭan tawh a, match 29-ah goal 10 khungin, assist vawi 10 a nei a, Rodrygo-a'n match 28-ah goal 12 khungin assist vawi sarih a nei tawh bawk.