Simeone fapa Giuliano-a'n goal a khung

Champions League-ah Atletico Madrid-in RB Salzburg 4-1 in an hneh a, Atletico manager Diego Simeone fapa Giuliano-a'n minute ngana lekah a khung. Spanish club tan hian Antoine Griezmann-a'n goal hnih khung belhin Marcos Llorente-a'n a khung ve bawk.

Red Bull Arena Salzburg-ah Giuliano-a'n bul a ṭan a, minute ngana lekah Julian Alvarez-a ball pek chu Simeone fapa hian box chhung aṭangin goal kilah kawh zetin a pet.

Kum 22 mi Giuliano hi Atlético Madrid academy aṭanga inzir chhuak a ni a, Zaragoza leh Alaves tan loan hmangin a khel tawh a, La Liga-ah goal khung tawh mah se tun ṭum hi European competition-a a goal khung hmasa ber a ni.

Argentine coach Simeone hian Giuliano bakah hian fapa pahnih dang Giovanni leh Gianluca te a nei a, anni pawh footballer tho an ni. Kum 29 mi Giovanni hi striker tho niin Napoli tan a khel mek a, kum 26 mi Gianluca pawh forward niin Spanish club tenau Rayo Majadahonda tan a khel thung.