Sorkar hmalakna a ṭha - MNF Ṭhalai

MNYF chuan nimin khan thuchah tichhuakin, Mizoram chu tun thlenga India rama Covid-19 vanga thi la awm lohna state awmchhun leh Sikkim tih loha a vei mek tlêm berna a ni thei chu sorkar leh khua/veng tina tlawmngai pawlte thawhhona ṭha tak a nih thu leh, India ram pum ngaihtuahin, Mizoram sorkar hmalakna chu a ṭhat thu an tarlang.

Covid-19 donaah kohhran leh mipuite'n sorkar an ṭawiawm laiin, sawisel tur dapa khawsa an awm reng nia sawiin MNYF chuan, "A bik takin Congress party hian sorkar thâ tihchak aia hripui denchhena sorkar thâ tihṭhum an tumna hian mipui an hmin lo tih inhria se, a thawh hlâwk lo ber leh che chhuak lo berte a phunchiar bera ṭang ringawt loin, sorkar finchhuah an duh chuan a thlenna tur dik takah thlen se, CM Pu Zoramthanga leh Health Minister pawh an inhawng reng a ni," an ti.

MNF ṭhalaite chuan, Mizoram sorkar hmalakna demna atan state dangte hmalak dan sawi ṭhinte chu state dang aia Mizoram ṭhat zawkna tam tak haider lo se an duh thu sawiin, "Mi ṭhenkhatin Assam sorkarin Covid-19 veite Rs. 6,000 zel pài anga an sawi pawh, kum thar lawka inthlang tur an nih avangin chumi denchhena hma la niin an lang," an ti a; state dang nena khaikhin rálah chuan Mizoram sorkar hmalakna a chhuanawm zawk hle niin an sawi.

MNYF tarlan danin, state awmna, state economy leh hmanraw neih dan azirtein swab sample endik man a inang thei lo. Chuvang chuan Indian Council of Medical Research (ICMR)-in March 17, 2020-a RT-PCR test man a bithliah Rs. 4,500 chu May 26-ah sût lehin, state tinte chu anmahnia rate insiam turin thuneihna a pe. March 17-a RT-PCR test man bithliah a nihin, state tam takin an zawm nghal a, Mizoram chuan July 30-ah test man a bithliah ṭan a ni.

Mizorama RT-PCR test man chu Rs. 2,500 a nia sawiin MNYF chuan, "India ramah a tlangláwn a ni a, RAT phei chu state liante pawhin man chawia an test laiin, tun thlengin Mizoramah a thlàwna kalpui a ni," an ti a; subsidise loha RT-PCR test man Rs. 4,500 chu full rate-ah chuan Rs. 5,539 a nih thu leh, mipui phur rih lohna turin Mizoram sorkarin tláwm zawkin rate a bithliah niin an tarlang.

MNF ṭhalai chuan, CM Relief Fund-ah ruling MLA-te leh ZPM MLA-te'n MLA fund an thawh avang leh mipui leh páwl hrang hrangin sum an thawh avangin lawmawm an tih thu an sawi a; sorkar hmalakna ṭawiawm zel turin mipui an sáwm a ni.