Vawiin Chanmari FC inkhel en hun

I League 2-ah vawiin chawhnu dar 2:00 hian Chanmari FC-in Kolkata club United Sports an mikhual dawn a, RG Stadium, Mualpuia inkhel en man hi Rs 50 chauh a ni. A hmuna en hman lo tan SSEN app kaltlangin a en theih bawk.

Mizo club hian match hmasa berah Manipur club Neroca chu Vincent Lalduhawma goal hmangin 1-0 in an hneh a, an khingpui tur United Sports hian Manipur club tho Keinou Library and Sports Association Football Club (Klasa) chu 2-0 in an hneh thung.

Chutihrualin Chanmari hi mahni muala khel tur an nih avangin Kolkata club lakah rinkai zawk an ni a, hnehna chang tur erawh chuan tlarhma lam an tihhriam hret a ṭul dawn. Neroca an hneh ṭumin striker Lalkhawpuimawia a che ṭha tawk lo a, Mapuia hian goalkeeper chauh a hmachhawn hnuah goal a khung loh bakah penalty a hlah bawk.

Winger pahnih Joseph Lalvenhima leh KC Malsawmsanga ten mual sir aṭangin an nawr ta tawk lo a, goal hmaah attacking midfielder Michael Lalbiaksanga rilru a fim tawk lo. Chutihrualin match khatna chauh a ni a, coach Dipankur Sharma-a'n an khelh dan a her rem hret theih chuan Chanmari goal bawh a na sawt thei ang.

Coach Dipankur a fimkhur avangin midfielder fing Paul Ramfangzauva'n attacking third a thleng pha lo a, Neroca laka inkhel thunun zawk mah se an chhuah tam ngam miau loh avangin an goal bawh a na tawk lo. United Sports lakah Chanmari insiamṭhat an tum dawn a, an theihna anga an khel chhuak a nih chuan entu mipui tan pawh au na tur a tam dawn.

I League 2-ah hian team pakua an awm a, vawi hnih ṭheuh an inkhelh chhuah hnuah a sang pahnihin I League an khel ang.