Gerrard-a'n Al-Ettifaq a chhuahsan

Liverpool legend Steven Gerrard chuan Saudi Pro League club Al Ettifaq chu thla 18 chiah a enkawl hman tihin inhriatthiam tawnnain a chhuahsan a, kum khata pound maktaduai 15 vel hlawha coach hlawh hnem ber pawl ni phak hian hna a nei ta lo!

Stevie hian July 2023 khan Saudi club hi January 2024 thleng atana contract ziakin a zawm a, a hnuah kum hnih dang atan contract a ziah belh a, kum 2027 thleng cham turin an inrem.

Mahse, tun season-ah Al Ettifaq-in beisei phak loin, league match 17 an khelh tawhah vawi nga chiah an la chak a, relegation zone aṭanga an himna chu point nga chiah niin, team 16 inelna league-ah 12-na an ni.

Gerarrd chuan, "Football hi chu sawi lawk theih a ni ṭhin lo a, kan beisei loh danin thil a thleng fo ṭhin. Chutihrual chuan he club leh Saudi Arabia zah tak chungin ka chhuak a, football tana an hnathawh hian hlawhtlinna a la thlen ang tih ka ring - season lo awm zel tur atan Al Ettifaq hi duhsakna ka hlan a ni," a ti.

Al Ettifaq president Samer Al Misehal chuan, "A chang chuan kan beisei angin thil a thleng ṭhin lo. Mahse, a hnathawhte avangin club hian kan hun kal zel tur atan hmabak êng tak kan nei a ni. Dinhmun ṭha zawkah club min hlangkai a, kan theihnghilh lo ang," tiin a sawi ve bawk.

Liverpool captain hlui Gerrard hian kum 2018 khan Scottish club Rangers-ah a coaching career zawh ṭanin, 2020-21 season khan kum 10 hnua a vawi khat nan league nomawi a chawipui.

November 2021-ah Aston Villa zawmin, match 40-ah vawi 13 chiah a chakpui avangin thla 11 hnuah ban a ni a, Al Ettifaq hi a enkawl hmasak ber season-ah khan parukna a nihpui a, match 59-ah vawi 23 chiah a chakpui thei a ni.