Dani Olmo lo kir hun tur chiang lo

Barcelona midfielder, hliam vanga chawl mek Dani Olmo lo kir hun tur a chiang thei lo. RB Leipzig aṭanga Barcelona pantu Olmo hi tun kar tawpah lo kir tura beisei ni mah se, a lo kir dawn lo.

Olmo hi January 19 khan Getafe nen an inkhelh ṭumin a inhliam a, hemi hnu hian a inlan leh tawh lo. Spanish midfielder hian Barca a pan hnuah neuh neuh vangin match khelh loh a ngah hle.

Kum 26 mi Olmo hian nipui lai khan euro maktaduai 60-in Barca hi a pan a, Catalan club a zawm tirhah club sum dinhmun fel lo avangin match hnih a khel thei lo nghal a, January thlatir khan club sum dinhmun chinfel lawk theih loh avangin match hnih a khel lo tawh bawk.

Hei mai a ni lo - tuna a inhliam hma hian hliam vangin ni 32 ngawt a lo chawl tawh a, amah chher hriamtu club-a a kir hnuah che ṭha thawkhat mah se, hliam leh boruak dang avangin a chawlh a ngai leh ṭhin.

Olmo hian tun season inelna hrang hrangah match 18 khelin goal ruk a khung a, assist vawi thum a nei. Champions League match-a Atalanta nen an inhmachhawn khan dam hman tura beisei a ni a, mahse, he thu buatsaih a nih thleng hian amahin training a la nei.

Barca hian Pathianni zan dar 6:30-ah Alaves an mikhual dawn a, Olmo a inlan thei dawn lo. Hetihlai hian thlatira Spanish Super Cup final-a inhliam, centre back Inigo Martinez chu a lo kir leh thei tawh dawn thung.

Spanish La Liga-ah Barca hi pathumna ni mekin, hmahruaitu Real Madrid chu point sarihin an phak lo mek. Real hian zanin dar 1:30-ah Espanyol an lenchilh dawn a, pahnihna Atletico Madrid chuan zanin dar 11:00-ah Real Mallorca an mikhual bawk ang.