Blasters-in Chennaiyin hneh

Kerala Blasters chuan Indian Super League-ah a vawi khat nan, khualmualah Chennaiyin FC an hneh a, 3-1 in an chak. Blasters hian minute thumna lekah Jesus Jimenez hmangin goal hmahruai an khung a, minute 37-naah Chennaiyin striker Wilmar Jordan Gil chuan red card a hmu zui.

Chak tur a chiang tawh tiin a sawi theih a, Blasters tan Korou Singh leh Kwame Peprah ten an khung belh - Korou hi ISL-a goal khung thei naupang pahnihna a ni a, kum 18 leh ni 58 mi chauh a ni.

Chennaiyin tan Vincy Barretto chuan hun pek belhah goal khung ve mah se, mualpho zualpui khuhna chauh a ni a, 3-1 in Blasters an chak. Inkhelh lai hian Blasters captain Adrian Luna leh a khelhpui Noah Sadaoui an innek sak sak a, sawizui a hlawh hle.

December-a coach Mikael Stahre a ban a, assistant coach T. G. Purushothaman kaihhruaina hnuaia khel Blasters-in hnehna an chan avangin playoff beiseina a nung thar a, Chennaiyin tan chance a chhe sawt thung.

Ningani zan inkhelah hian Chennaiyin tan PC Laldinpuia, Laldinliana Renthlei leh Lalrinliana Hnamte ten inkhel bul an ṭan a, Blasters tan R. Lalthanmawia'n a career-a a vawi khat nan ISL-ah bul a ṭan.