Inter tana hnawk thei Milan

Pathianni zan dar 10:30 hian Serie A inkhel pawimawh a awm dawn, champion lai Inter Milan chuan AC Milan an hmachhawn ang - Milan hi mualneitu zawk an nih dawn avangin a hmuna ṭantu an ngah fal dawn tihna a ni.

Sergio Conceicao enkawl Milan hian season an hmang ṭha vak lo, mahse tun season chhung ngeiin Inter Milan hi vawi hnih an hneh tawh! A zawna vawi thum hneh an tum dawn, inrintawkna pawh an nei sang hle ang tih a chiang.

Milan hian hliam vangin defender Emerson Royal an chhawr thei dawn lo, thlasik bazar laia lakluh Kyle Walker chu a vawi khat nana inlan turin a inpeih thung. English defender hi a inlan a nih chuan a match hmasa ber boruak hi a sang khawp ang.

AC Milan manager Sergio Conceicao chuan, "A pawimawh ber chu thi leh thau pawlha khel thei player thlan chhuah a ni, theihna zawng zawng kan hlan a nih chuan Inter kan hneh leh thei ang," a ti.

Inter hian point 50 hmuin pahnihna an ni mek a, an chunga awm Napoli aiin point thumin an hmu tlem zawk. Inter hi match khatin an khel tlem thung, season chawhnu lam a nih tawh avangin point hloh a pawi zual a, zaninah tlawm loh an tum ang.