NBA-a Indian hmasa ber Satnam Singh

Nimin khan Barclays Center, New York-ah 2015 NBA draft neih a ni a, thlan zingah Satnam Singh a tel. Punjabi basketball player kum 19-a upa hi Dallas Mavericks-in 52-naah an thlang a, Indian zinga NBA club tana inziak lut hmasa ber an ni.

Nikum khan Canada-a piang India thisen kai Sim Bhullar chuan NBA club Sacramento Kings tan a khel a, amaherawhchu Bhullar hi chu Canadian a nih avangin NBA-a Indian hmasa ber chu Satnam hi a ni.

Football-ah chuan contract nei lo player chu club-in ṭha a tih phawt chuan a lut thei a, khawvela basketball league ngaihven hlawh ber National Basketball Association (NBA)-ah chuan a danglam daih. Player tan NBA khel tur chuan NBA draft paltlang a ngai a, draft-a telpha turin tehfung paltlang ngai a awm bawk.

Draft-a player tam zawk hi college player leh ram tana khel pha player an ni a, Satnam Singh hi high school player tlemte zinga mi a ni. High school aṭanga NBA lar zui an awm nual a, chung zingah chuan Kevin Garnett, Kobe Bryant, Jermaine O'Neal, Tracy McGrady, Amar'e Stoudemire, LeBron James, Dwight Howard leh Andrew Bynum te chu a langsar zual an ni. Chutiang bawkin regular season leh playoff-a inlan miah lo player an awm ve bawk.

Tunge Satnam Singh?

December 10, 1995 khan Sat­nam Singh Bhamara hi Punjab-a thingtlang khaw pakhat Ballo ke-ah a piang a, mihring 800 bawr vel lek awmna khua a ni.

Satnam te khuaah hian basket­ball court a awm lo a, hei vang hian kum 12-a upa a nihin basketball academy-ah dah a ni.

India-a NBA Director of Bas­ket­ball Operations Troy Justice chuan, "Satnam hi ka hmuh hmasak ber chuan pheikhawk thler bunin a lo inkhel a, a pheikhawk bun lai chu a neih chhun a ni bawk. Amahah beiseina sang tak kan nei a, pheikhawk thar kan lei a, kan bulah kan awm tir bawk. Kar ruk chhung leka a hmasawnna chu hmuh tham a ni," tiin Satnam-a tun hma hun a sawi.

Satnam hi kum 14 leka upa a nihin feet sarih a ni tawh a, tunah hian feet sarih leh inches hniha sang niin a pi pawh feet ruk leh inches kua zeta sang a ni.

Punjabi tlangval chuan, "Ka pa khan basketball khelh a duh a, ka puin a phal lo. Loneitu an ni a, keimah angin a vannei ve lo. Tun hun kan thleng thei hi min chhuang a, min lawmpui em em a ni," tiin a sawi.

Satnam hi Reliance sponsor player 29 zingah telin IMG Aca­demy, Florida-ah September 2010 aṭangin a inzir ṭan a, a ṭhat em avangin IMG Academy hian chelh zui. 2014–15 season khan Satnam hian IMG Academy tan match tinah chawlh ruain 9.2 points, 8.4 rebounds leh 2.2 blocks a nei pha hial.

Marvericks player thar Sat­nam hian 2013 FIBA Asia Cham­pionships khan India tan a khel a, match ruk khelah chawhrualin 4.2 points leh 2.7 rebounds nei ang a ni.

Mavericks neitu Mark Cuban-a'n India mipui zat hrechungin Satnam hi a la lut thei a, chutiang thleng tur pawh chuan Punjabi tlangval hian baksetball hi a thiam ve tawk tih a chiang.

Satnam chuan, "Ka awm dan hi sawifiah thiam bak a ni. Indian basketball tana kawng hawnsaktu ka nih ngei ka beisei," tiin Indian news channel NDTV a hrilh.