Copa America Liverpool player thar Firmino tan fiahna
Pathianni zing dar 03:00 hian Brazil leh Paraguay te chuan Copa America 2015 quarterfinal match hnuhnung ber Estadio Municipal de Concepcion-ah an khel dawn. Inkhel hmuhnawm en duh tan thawh hma a inchhir awm loh hle ang.
Tournament thlengtu Chile leh Peru ten quarterfinal an pal tlang tawh a, anni hi semifinal-ah an inhmachhawn zui ang. Tukin zing inkhel Argentina leh Colombia a chak zawk leh Pathianni zing inkhela chak zawk te hi semifinal-ah an in tum leh bawk ang.
Paraguay an vannei
leh thei ang em?
Kum 2011 Copa America-ah khan team pahnihte hi Group match-ah 2-2 a an inhnehtawk hnuah quarterfinal-ah an inhmachhawn leh bawk. Goal khung loa an inhneh tawk hnuin penalty shootout-ah 2-0 in Paraguay an vannei zawk. Tun ṭumah hian he an vanneihna hi an chhawm leh theih dawn leh dawn loh chu kan hmu thuai dawn e.
Neymar tel lo Brazil
Kum 51-a upa manager Dunga enkawlna hnuaiah Brazil an par vul mek a, an vul vanglai takin Colombia lakah an tlawm. An captain Neymar chu a chet mawi loh vangin hnawh chhuah a ni bawk. Hei vang hian Barcelona star hian Copa America-ah an ram ai a awh thei tawh rih lo.
An captain tel loin Brazil hian an group match hnuhnung berah Venezuela chu 2-1 a an hneh theih avangin inrintawkna an neih phah a rinawm.
Tlar hmaah Santos striker Robinho a awm a nih chuan a chawm turin Liverpool player pahnih Roberto Firmino leh Philippe Coutinho te an awmin a rinawm a, anni pahnih hi season thara Premier League-a inkawp tur an ni.
Tun tournament-a goal nga khunga goal hnih chhuahtu Brazil hian tlar hnungah Paris Saint-Germain duo David Luiz leh Thiago Silva te an dah leh ngei anga, anni pahnih hi an innghahna tur kulh pawimawh an ni dawn chiang.
Firmino mawhphurhna
Brazil attacking midfielder hi kum 23 chauh la ni mah se tunah chuan an ram inngahna a nih a ngai dawn. Nikum November thla aṭanga ram tana khel ṭan chauh mah nise ram tan vawi kua a inlan aṭangin goal li a khung tawh. Heng a goal khung te hi chakna goal a ni vek nghe nghe.
Quarterfinal lut tura Brazil-in Venezuela an hneh ṭum pawh khan Firmino goal khung an chak pui nghe nghe. Hei vang hian Brazil mipuite chuan Liverpool player thar chungah hian rinna an nghat a, an captain Neymar a awm loh takah chuan an beisei neih chun ber a ni rih. Innghahna tlak a ni em tih chu a lang chiang dawn e.