UEFA dan court-in hman phal lo

Belgian court chuan Europe khawmualpuia football thuneitu sang ber UEFA chu Financial Fair Play (FFP) dan thar hman an tum chu hmang rih lo turin an hriattir.

FFP hnuaiah hian club-te chu transfer bazar a an sum hman dan tur bithliah sak an ni a, tuna UEFA-in ruahmanna a siam tharah chuan transfer bazar-a che turin club-in euro maktaduai 45 aia tam an hloh tur a ni lo tih chu euro maktaduai 30-ah tih hniam a ni a, hei hi mi ṭhenkhat chuan duh loin European Court of Justice (ECJ)-ah an zualko ta a ni.

Belgian court thu­tlukna hi UEFA thu­chhuak chuan an khinlet tur thu sawiin dan thar an duan chu tihhlawhtlin ngei an tum thu an sawi ve thung.

UEFA duan FFP dan thar duh loa khingtute hi football agent lar Daniel Striani bakah tun hnaia club hausa thar Manchester City leh Paris St-Germain ṭantute an ni.

Arab sumdawng hausa ta ni mek Man­chester City leh Paris St-Germain te hi nikum lam khan an club sum thawhchhuah aia tam transfer bazar-a an hman avangin pawisa chawi tir an lo ni tawh nghe nghe.

UEFA president Mi­chel Platini chuan FFP dan thar hi hahdam zawk leh club te hreng lutuk loa kalpui tur a nih thu a lo sawi tawh a, karleha Prague khawpuia executive committee an neih hunah FFP dan thar hi an pawm dawn leh dawn loh sawi tura ruahman a ni.

Jean-Louis Dupont, UEFA khingtu te ukil chuan, "Kan ngaihdanah chuan court hian thu­tlukna siam tur dik tak a siam a ni," a ti.

Hetihlai hian UEFA erawh an dinna ngaiah an ding a, "UEFA chuan FFP hi European Union hnuaia dan leh hrai engmah bawhchhe loin kan duang a, hei hi European Court pawhin hmuthiamin kan buaina hi a chinfel thuai kan beisei a ni," tiin thuchhuah an siam.