Peru tan captain Guerrero a inlar

Zirtawpni zing khan Peru chuan captain Paolo Guerrero-a hat-trick siam hmangin Bolivia 3-1 in an hneh. Chile hnungzuiin Copa America semifinal an in pet tling a, anni pahnih hi final luh inchuhin Thawhlehni zing khian Estadio Nacional-ah an in tum zui bawk ang.

Flamengo striker hian an group match pathumah goal khung lo mah se knockout round-ah chuan rintlak anih zia a tilang chiang hle. Minute 20 naah a goal hmasa ber khungin a hnu minute thum lekah a goal hnihna khung zui lehin chawlhlawkah a team te 2-0 in hma a hruai pui.

Bayern Munich striker hlui hian second half-ah pawh a goal khung ala duh tawk lo a, minute 74 a khung lehin an ram team hmun himah a dah. Bolivia tan hun tawp dawn minute ruk chauh awm tawha Wigan striker hlui Moreno Martins penalty pet goal-in kawngro a su tawh lo.

Kum 31-a upa Guerrero hian Peru tan goal 24 khung tawhin ram tana goal khung hnem ber dawttu a ni ta. A tluk loh awmchhun chu goal 26 khung tawh tu Teofilo Cubillas chiah a ni. Ram tana goal khung hnem ber ni thei turin hun leh theihna a neih avangin he dimhmun hi a luah lo ang tih a sawi theih loh.

Innghahna tlak captain Guerrero chuan, "Tournament kan khelh tirh ai khan kan ṭha telh telh zawk. A tirah kha chuan mi rin kan hlawh lo tih kha a chiang reng a, mahse tunah chuan kan inkhel an en hnuah team ṭha leh hlauhawm kan nih zia chu an hre tawh ang," a ti.

Bolivia Coach Mauricio Soria chuan, "Chak tur chuan kan thiamna bakah tharum hmanga beih an ngai tih ka sawi lawk vek a, mah se chutiang chuan kan ti thei lo. Kan tlar­hnung phui ṭhat loh chu thu hran nise kan zavai mai khan kan inkhelah khan rilru kan pe tawk lo hle. Peru-in chak an phu a, an kal zelna turah duhsakna ka hlan e," tiin a sawi.