Arsenal leh Cech inrem ta

Chelsea goalkeeper Petr Cech chuan nimin khan Arsenal-ah medical test a nei a, he thu i chhiar lai hi chuan Cech hi Arsenal goalkeeper a ni tawh ang.

Gunner player thar hi an history a goalkeeper hlawh hnem ber tur a ni a, kar khatah pound 100,000 a hlawh ang. Tun nipui transfer chhunga Arsene Wenger-a'n a player lakluh hmasa ber niin pound maktaduai 11 man a ni.

Kum 33-a upa hi pla­yer ṭha leh innghahna tlak tak ni mah se season hmasa khan Thibaut Courtois lakah a dinhmun a hloh a, Premier League champion tan vawi 16 chiah a inlan. A kum tam deuh tawh mah se a theihna leh thiamna enin kum thum vel chu ṭha takin a la khel theiin a rinawm.

Kum 2004 khan Rennes aṭangin Czech Republic international hian Chelsea a zawm a, London club-ah hian kum 11 hun a hman chhungin Premier League nomawi pali, FA Cup pali, League Cup pathum bakah Champions League leh Europa League pakhat ve ve a chawi hman.

FA Cup champion Arsenal hian goalkeeper Wojciech Szczesny leh David Ospina nei mah se Cech hian a nek chhuakin a rinawm.