Everton-ah Deulofeu a kir
Barcelona forward Gerard Deulofeu-a'n loan-a a lo khelh tawhna Everton bawk a pan leh a, a man atana pound maktaduai 4.3 sengtu Merseyside club-ah hian kum thum chhung cham turin contract a ziak.
Kum 21-a upa Spanish forward hian kum 2013-14 khan loan-in Everton-ah hian a hun a lo hmang tawh a, Barcelona-ah player ṭha an tam avangin season hman zawh takah khan Sevilla lamah loan-in a khel.
Spain tana vawi khat lo inlan ve tawh player a la lut thei chu Everton boss Roberto Martinez a lawm a, Spanish manager chuan, "Kum hnih liamtaa kan hnena khel ṭhin Deulofeu ai khan tuna Deulofeu hi a puitling tawh zawk a, player hmasawn chak tak leh in ang maia Everton ngaitu kan hnena khel tura kan la lut thei hi ka lawm a ni," a ti.
Deulofeu leh Martinez te hi Spanish ve ve an nih avangin an inngaina hle a, Deulofeu hian Everton pan tur hian sawmna duhawm zawk tam tak a hnar nia sawi a ni.
Barcelona pawhin an academy chhuak Deulofeu hi chhuah mah se chan hlen an duh bik lo, an beisei anga a ṭha chho thei a nih chuan Everton aṭanga leilet leh thei turin inremna an siam.