Kum hnih chhung atan Dempsey an hrem

USA captain leh MLS club Seattle Sounders forward ni bawk Clint Dempsey chu US Open Cup an khelh ṭuma a chet dan mawi lo avangin hrem a ni.

Kum 33-a upa forward hian Portland Timbers nen an inkhelh ṭuma a player pui hnawhchhuah a ni chu a hrethiam lo a, referee Daniel Radford lehkhabute kenlai chu pawhthlak sakin a pawtchhia a ni.

Fulham leh Totten­ham Hotspurs forward hlui hi kum hnih chhung emaw match ruk chhung US Open Cup khel thei lo tura hrem a ni a, kum hnih ral hmain US Open Cup match ruk a club khelhnain khel hman mah se kum hnih a la tlin loh chuan kum hnih a tling tlak a ngai dawn tho a, match ruk khelh hmain kum hnih ral hman mah se match ruk khelh thleng a nghah a ngai dawn tho bawk.

USA tana vawi 112 lai lo inlan tawh Dempsey hi Major League Soccer match thum khel thei lo tura hrem a lo ni tawh a, an hremna hi khinglet a tum lo.