Bournemouth-ah defender danglam
Season thar aṭanga Premier League khel tur Bournemouth an ṭang a, Ipswich Town left back Tyrone Mings chu an club chanchina player man to ber ni turin an la lut.
Bournemouth hian an player man to ber ni mek Callum Wilson chu pound maktaduai 3-in kum 2014 khan Coventry City aṭangin an la lut a, Ipswich player ṭhang duang tak Mings tan hian pound maktaduai 8 lai an thehchhuak nia sawi a ni.
Kum 22-a upa Mings leh Bournemouth-te hi an inbe fel vek tawh a, medical neih chiah an hmabak tawh.
Southampton Academy chhuak Mings hi kum 2012 khan £10,000 lekin Ipswich Town chuan non-league club Chippenham Town aṭangin an leichhuak a, an tisual lo tih a lang chiang hle.
Arsenal pawhin an lo thlithlai tawh nia sawi Mings hi player danglam tak a ni. Kum 2013 khan twitter lama Ipswich fan pawisa nei lo nia insawi chu inkhel enna tur ticket a lo leisak tawh a, nikum Krismas khan in leh lo nei lo mi retheite hnenah ei leh in tur a sem bawk.
Nikum nipui lai khan a jersey hak ṭhin number 15 chu 3-a a thlak avangin a hming chuanna jersey lo lei tawh a fan-te chu jersey thar a leisak vek!
Premier League club hlun nisa Aston Villa, West Bromwich Albion leh Newcastle United te sawmna hnara a vawi khat nana Premier League khel tur Bournemouth lam pan thlangtu Mings hi non-league club Bath City leh Gloucester City striker hlui Adie Mings a fapa a ni a, a pa hi Chelsea-ah scout hnathawkin a awm mek.