Wimbledon An khelh ṭan hmain Wimbledon hre chiang ang

June 29 aṭanga July 12 inkara khelh tur Wimbledon Championship hi kum 1877 aṭanga khelh ṭan niin a awlsam zawngin Wimbledon tia sawi mai ṭhin a ni. Wimbledon hi khawvela tennis tournament upa ber niin Grand Slam tournament zingah Australian Open leh French Open (Roland Garros) zawha khelh niin US Open-in a zui leh ṭhin.

Kum 1975 a US Open chu hard court a thlak a nih hnu leh kum 1988-a Australian Open Hard Court-ah bawk an thlak hnu khan Wimbledom chauh hi Grand Slam tournament 'Grass Court' a khelh awmchhun a ni ta.

A tir kum sarih chhung chu Mipa inel nan chauh hman a ni rih a, mahse kum 1884 aṭang khan hmeichhia an telh ve bakah hemi kum tho hian Double inelna neih ṭan a ni bawk. Hmeichhe champion hmasa ber chu Maud Watson niin an lawmman hi Oxford University Lawn Tennis Club-in a tum sak a ni nghe nghe.

Mipa champion hmasa ber chu British mi Spencer Gore niin final-ah a hnam pui William Marshall chu 6–1, 6–2, 6–4 in a hneh. English leilung fa ni lo champion thei hmasa ber chu Autralian tennis star Norman Brookes niin kum 1907 khan a champion.

Wimbledon-ah hian a tir aṭanga tun thlengin mihang (Negro) champion thei hi pakhat chiah ala awm a chu chu American World number 1 pawh lo ni tawh Arthur Ashe-a niin kum 1975 khan a champion a ni.

Indopui vanga buaina

Kum 1915 aṭanga kum 1918 chhung khan khawvel indopui pakhatna vangin inelna neih theih a ni lo a, indopui pahnihna neih lai kum 1940 aṭanga kum 1945 chhung pawh khan tournament hi chawlh lailawk a ni bawk. Heng indopui vawi hnih lai lo hi chuan tluang takin nikum thleng khan neih zel a ni.

Inkhelh kalphung

Mipa single leh double hi 'best-of-five set' hmanga chak zawk zawn ṭhin a ni a, inelna dang zawng erawh chu 'best-of-three set' hmangin chak zawk zawn a ni thung. Set tinah game ruk ve ve an lak chuan 'tiebreak' hmangin set la tur zawn a ni bawk.

Kum 1922 hmalam kha chuan champion lai te hian first round khelh ngai loin an bye ṭhin a, an khingpui turte an inkhelh hah laiin an lo chawlh theih avangin champion leh turin an dinhmun a ṭhat phah ṭhin hle. Amaherawhchu he dan hi kum 1922 hnulamah erawh chuan hman zui a ni ta lem lo. Champion lai pawhin first round aṭangin an khelh a ngai tawh a ni.

Thawmhnaw

Grand Slam tournament dang ang lo takin Wimbledon-ah hi chuan kawr thawmhnaw rawng inang an ha ṭhin a,tumhma chuan a hring dal leh senduk an ha ṭhin. Mahse he an thawmhnaw rawng hi thlakin kum 1949 aṭang khan player zawng zawng ten a var an ha vek tawh thung. A var hlang hlak ni lo rawng danga chei ran deuh pawhphal a ni tawh.

Kum 1962 khan Maria Bueno chuan thuamhnaw sendang a rawn ha a, a kum leh aṭangin dan hi khawng leh zuala keng kawhin tu pawh Wimbledon khel tur chuan thuamhnaw var a ha tur a ni tiin thu an ti tlu ta a ni.

Player te thawmhnaw hak an duhtui ang tho hian tournament a mi pawimawh chin chuan thawmhnaw rawng inang an ha tlangpui. Kum 2006 aṭang khan official, ball boy leh ball girl te chuan American designer Ralph Lauren a siam uniforn inang kawr pawduk leh a paw uk an ha bawk.

Lawmman chu

Kum 1968 aṭang khan lawmman atan pawisa tih tel ṭan niin tun thlengin hei hi chhunzawm a ni nghe nghe. Kum 2007 hmalam kha chuan French Open leh Wimbledon Mipa single champion hian hmeichhe single champion aiin pawisa an dawng tam ṭhin a, mahse 2007 aṭang hi chuan lawmman hi a in ang a sem a ni tawh. Kum hmasa lam aiin kuminah hian inelna hrang hranga lawmman hi 7% ṭheuhin a pung dawn a ni.

Mipa champion hian silver aṭanga siam nomawi inches 18.8 a sang leh a diameter inches 7.5 chu kum 1887 aṭang khan an dawng ṭhin. Hmeichhe champion hian silver aṭang siam tho a phek bial "Venus Rosewater Dish" tia an sawi chu an dawng ṭhin. A tlangpui thuin lawmman hi Wimbledon organiser All England Club president -in a sem ṭhin a ni.