MotoGP A hmahruaina sawh ngheh tum Rossi

Tun hnai MotoGP intlansiak hnuhnung paliah Jorge Lorenzo chu tuma el phak lohin pakhatna a ni fai vek. Pathiannia an tlan leh tur Netherlands Grand Prix-ah pawh hnehna chang leh tur a rin a ni. Mahse rider champioship a hmahruai mek tu Valentino Rossi chuan a dinhmun sawh nghet turin hnehna chan a tum ruh hle bawk.

Tun season-a a vawi riat nan a an intlansiakna tur Motul TT Assen tlankawng hi 4.5km a thui niin 14m a zau a ni thung. Kawngkawi 18 awmin heng zinga 12-te hi ding kawi niin a dang zawng chu vei kawi a ni thung. Kawng ngil thu tak mai 487m zet a thui awm bawkin lap 26 an tlan ṭhin.

Nukum khan he hmunah hian Repsol Honda rider Marc Marquez chu pakhatna niin World champion a ni zui nghe nghe. Mahse kuminah erawh kum 22-a upa rider hian beisei a phak lo tluang zel a, rider championship-ah pangana a ni phak hram rih a ni.

Dutch Grand Prix an tlan tur thlir lawkin Spanish rider Lorenzo chuan, "Tunah hian kan bike hi duthusam a ṭha a ni rih a, ka taksa a fit ṭhat bawk avangin Pathianniah pawh hnehna chang leh turin ka inring tawk hle. Amaherawhchu, bike intlansiakah hi chuan vannei leh vanduai inkar a hlat em avangin sawi lawk vek theih erawh a ni lo," a ti.

World champion vawi kua lo ni tawh Rossi chuan, "Tun season-ah beisei phak bakin kan team kan che ṭha a, intlansiak lo awm leh turah pawh hian harsatna tawk loin hun hlimawm tak kan neih leh theih ngei ka beisei. Lorenzo nen kan inthlauhna hi point khat chauh a nih avangin hmahruai chhunzawm ka duh a nih chuan ka chak ngei a ngai. In er niloin thianghlim takin kan inel leh anga, hnehna changtu nih ngei pawh ka tum ang," tiin a sawi.