Inter ka pan kha ka tisual - Lukas Podolski

Lukas Podolski chuan season thara Arsenal team a khelh tumin ngawrh takin training a nei mek a, loan-in thla ruk chhung Inter Milan-ah hun ava hmang chu a inchhir thu a sawi.

World Cup champion pawh lo ni tawh Podolski hian season hmasa khan Gunners-ah hmun a chan mumal loh avangin Inter-ah thla ruk chhung hun ava hmang. Amaherawhchu beisei angin ava che ṭha lem lo a, goal khat chiah khungin London-ah a lo kir leh tawh.

Arsenal manager Arsene Wenger-a hnuaia hmun nghet chan leh tum Podolski chuan, "Premier League kal hmang leh ka inkhelh dan hi a inmil avangin helaiah hian ka tan hmun a awm tih ka hria. England-ah hian thil a inthlak danglam chak em em a chumi man pha tur chuan insiam rem ve zel a ngai. Football-ah hian thutlukna siam sual theih ve tak mai hi a ni a, season hmasa Inter ka pan pawh kha ka tisual let der a ni. Tunah chuan fan ṭha takte ṭawiawmna hnuaiah Arsenal hlawhtlin pui turin ka theihtawp ka chhuah leh tawh ang," tiin a sawi.