Schneiderlin-a'n Old Trafford a pan dawn? Transfer laiin Manchester United an duai ngai lo

Manchester United, Arsenal leh Tottenham ten Southampton midfielder Morgan Schneiderlin lak luh an tum vek a, thuthang hnuhnung berah chuan French midfielder hian pound maktaduai 24-in Old Trafford a pan dawn ni a tarlan a ni.

United nge nge

Sir Alex Ferguson hnuaiah Manchester United hi player lei thiam club tiha hriat lar ṭhin an ni. Premier League ṭan dawn khan English champion lai Leeds United aṭangin Manchester United-in Eric Cantona an la lut a, tun thlengin transfer fuh bik anga sawi a ni.

Leeds chairman Bill Fother­by chuan defender Denis Irwin chungchangah United chairman Martin Edwards a bia a, office-a ṭhu ve Sir Alex chuan lehkha themah 'Cantona?' tih chu Edward-a hnenah ava pe a, Leeds chairman hian Cantona chungchanga biak zui a inhuam thuin a chhang.

Manchester United-in French forward hi pound maktauduai 1.2-in an la lut zui a, Premier League-a Eric Cantona sulhnu hi sawi nawn a ngai tawh lo.

Cantona rual hian Notting­ham Forrest aṭangin pound maktaduai 3.75-in Roy an Keane an la lut a, hei pawh hi captain ropui tho a ni. Sir Alex-a ropuina chu player ṭha lak luh leh a player chher chhuahte mawi taka huang khata a dah thei kha a ni.

United-in pawisa an hmang thiam a, a hunah pawisa sen an hreh lo bawk. Nomawi chawi kawnga player pawimawh Teddy Sheringham, Andy Cole, Dwight Yorke, Jaap Stam, Rio Ferdinand, Ruud van Nistelrooy, Wayne Rooney, Dimitar Berbatov, Nani, Michael Carrick, Shinji Kagawa leh Robin van Persie te hi an hunlaia player manto a, amaherawhchu heng player-te hian United tan sulhnu ṭha tak an hnutchhiah an ni.

Chutiang bawkin Cristiano Ronaldo, Nemanja Vidic, Patrice Evra, Park Ji Sung leh Henrik Larsson te kha player manto an ni si lo a, team tana thawhhlawk bawk si an ni.

Sir Alex-a'n pawisa a hmang thiam a tih theih rualin tihsual fe fe pawh a ngah hle. Danish keeper Peter Schmeichel kha £550,000 lekin a la lut a, a thlaktu tur erawh a tifuh lo nasa hle. Schmeichel thlak tura lak Fabien Barthez, Massimo Taibi, Mark Bosnich leh Ricardo te kha an hlawhchhamah a ngaih theih a, a hnu lam deuha lak Tim Howard pawh a fuh chuang lo. Dutch keeper Van der Sar erawh a fuh viau thung.

United transfer zingah Juan Sebastian Veron, Diego Forlan, Kleberson, Wilfried Zaha, Eric Djemba-Djemba, Anderson leh Bebe te chu tihsual langsar zual an ni a, chutihrualin Uruguayan forward Forlan hian beisei pha lo mah se nomawi chawi kawngah a thawh hlawk lawi si.

Sir Alex-a'n player lei a thiam a, chutihrualin lei thiam turin pawisa a ngah ve bawk. Scottish manager vanneihna chu a lei fuhte an langsar a, noimawi an chawi bawk avangin a lei sualte an sawi sak tam lo.

United thar

Manager ropui Sir Alex-a chhuah rualin United hlutna a tla hniam a, player ṭhain David Moyes enkawl United an pan hreh. Moyes-a'n nipui transfer-ah Marouane Fellaini a man phu lo a tamin a la lut a, January-ah Jose Mourinho duh loh Juan Mata manto takin an la lut leh bawk.

Louis van Gaal-a hnuaiah United hlutna a sang hret a, amaherawhchu Dutch manager hian player vantlang pawh manto takin a la lut vek. A awmzia ber chu Van Gaal hian Moyes-a hnuaia United result chhia a tuar a ni ber a, player lei theih remchang apiang a la lut a, season tawpah squad balance thu uar takin a sawi.

Van Gaal hun

Kum 63-a upa Van Gaal-a'n season tharah chhuanlam a nei thiang tawh lo. Season khatnaah pound maktaduai 150 bawr vel a hmang tawh a, tun season-ah pawisa hman tur a ngah bawk.

PSV Eindhoven aṭangin pound maktaduai 31-in Mem­phis Depay a la lut tawh a, squad chei ṭhat hi a lak thu tak hle a pawimawh. United hian midfielder an mamawh a, German midfielder Bastian Schweinsteiger nen sawi zawm an ni.

Amaherawhchu thu thar berah Schneiderlin an la lut dawn niin tarlan a ni a, kum 25-a upa French midfielder hian United a zawm a nih chuan kum 30-a upa Schweinsteiger an dawr zui tawh dawn lo tihna a ni ang.

United tana thu lawmawm tur chu London club Arsenal leh Tottenham Hotspurs te lak tum an chhuhsak tur hi a ni. Saints midfielder Schneiderlin chungchanga thuthang hi a dik a nih pawhin transfer tawp a la ni lo, Van Gaal leh United zia tak tak lanna turin player lak luhna hun a la rei tak a la awm.