Wozniacki a kal zel

Kum 2009 Aegon International champion­ship nomawi lo chawi tawh Caroline Woz­niacki-i'n vawi hnih nana champion leh a tumna kawngah Ningani zan khan Andrea Petkovic hnehin semifinal a lut leh ta.

Wimbledon inbuat­saihna tournament-ah hian Wozniacki hian 7-5, 6-1 in hnehna a chang a, final lut turin Belinda Bencic chu nizan khan a hmachhawn leha result erawh kan hre hman ta lo.

World number 1 hlui hian set khatnaah game hmasa pathum chu a hloh nghal vek a, mahse insiam rem thuaiin darkar khat dawn an inbeih hnuah game 12 naah Petkovic service chhuhsak letin 7-5 in a lehthal.

Set hnihnaah erawh Wozniacki hian harsatna a tawk tawh lo, a service a hum bakah a khingpui Petkovic chu game khat chiah a lak tir.

He tournament-a seeded pakhatna Woz­niacki chuan, "A harsa in a hahthlak tak zet. Petkovic khan a khelh ṭhat bakah a thiam em em a, min ti mangang tak zet zet. Hnehna ka chang hi ka beih hran hram vang chauh a ni e," tiin a sawi.