FIFA buaina Blatter-a'n khawvel a bawl em ni?

June 2-a FIFA president a nihna a chawlhsan tur thu puangtu Sepp Blatter chuan FIFA president hna a bansan loh thu a sawi.

Swiss newspaper Blick-in a tarlan dan chuan FIFA museum a pungkhawm mipuite hnenah Blatter hian, "President ka nihna aṭangin ka bang reng reng lo. Kei leh ka thawhpuite FIFA rorelna kutah kan tlu lut mai zawk a ni," tiin thu a sawi a ni.

Kum 79-a upa Swiss pachal hian a ṭum nga nana FIFA presi­dent-a thlan a nih hnu ni li naah a ban tur thu a sawi a, amah thlaktu tur thlanna hi December-ah emaw February 2016-ah neih theih beisei a ni. A ban tur thu a puan zet hnu hian amah thlaktu tur mi ṭha a hmuh zawh loh chuan FIFA president ni tura a chuh leh tur thu a lo sawi tawh bawk.

FIFA hi tun hnaiah a hming chhe hle a, US Department of Jus­tice-in eiruk thubuaia FIFA hruaitu engemawzat an man hnu lawkin Swiss Court chuan 2018 leh 2022 World Cup thlengtu tur thlanna kawngah thil dk lo a awm nia ngaiin a chhui chiang ve leh bawk a ni.

FIFA president aṭanga a inhnuh­dawh thu a puan ṭum khan Blatter hian, "FIFA member te aṭangin thlawpna ṭha tak hmu mah ila hmun hrang hranga football khawvela inhnamhnawih te aṭangin thlawpna ka hmu ṭha tawk loah ka inngai a ni. Chuvangin mawhphurhna ka kova innghat zawng zawngte chu FIFA roreltu te kutah ka nghat ta a, president thar thlanna neih a nih hma chu ka office ka luah chhunzawm rih dawn a ni," tiin a lo puang tawh.

Blatter hian FIFA president aṭanga a inhnuhdawh thu a puan­naah hian 'ka bang e' tih ṭawngkam vawi khatmah a hmang lo a, a ban leh loh thu a sawi Swiss newspaper tarlan hi a dik a nih ngat chuan hawtu an tam lehzualin a rinawm.

Hetihlai hian Canada rama Hmeichhe World Cup neih meka final match tur chu US leh Swiss court te'n FIFA an chhui mek avangin Blatter hian a chhim thei lo maithei a, champion team hnena trophy pe tur ringawtin a kal maithei bawk. FIFA erawhin Hmeichhe World Cup final chhim tura kal tur hi an la tichiang lo a, Sepp Blatter hi a kal thei lo a nih chuan secretary general Jerome Valcke a kal tura beisei a ni.

FIFA thupuangtu chuan, "FIFA president leh FIFA secretary ge­neral-te zinkualna tur leh hun hman dan tur chu a hun takah puan­chhuah a ni ang," a ti.