Ghana ball boy hlawh leh player hlawh a inzat!

Kum 2014 Brazil World Cup-a Ghana din­hmun zirchianna report chuan player-te leh ball boy hlawh a inzat thu a ziak.

Kum 2014 World Cup-a first round aṭanga tla Ghana hian an ball boy Ismail Hamidu chu US dollar 100,000 an hlawh tir a, a hlawh zat hi player mai bakah team doctor, coach leh manager James Kwesi Appiah te hlawh zat nen a inang a ni.

Phek 396-a chhah report-in a tarlan dan chuan Black Stars (Ghana koh duatna) te hian World Cup 2014-ah khan sum an inseng nasa hle a, team official drummer pawh US dollar 5,263 lai an hlawh tir a ni.

Report-in a tarlan dan chuan 2014 World Cup-a Ghana dinhmun ti khirhkhan tu lian tak chu Ghana sorkarin player 23 awmna squad-a player pakhat zela US dollar 100,000 pek a remtih hnua player ten pawisa tiam zat hi a sum faia hmuh an inbeisei vanga team boruak ṭha lo chu a ni.

World Cup 2014-a Ghana team dinhmun zirchian a nih chhan tak hi sum hmanna chiang lo lutuk te, chhinchhiahna leh a tihchianna engmah awm si lo a sum leh pai luanral hnem lutuk vang te a ni ber a, sum hmanna diktak hi report chuan hriat a tum a ni.

Ghana hian World Cup an khelh phak avang khan dollar maktaduai 8 lai an dawng a, first round pawh paltlang zo lo chungin dollar maktaduai 4 lai an hmangral a ni.