Hmeichhe World Cup A vawi khat nan England-in semifinal lut

England chuan a vawi khat nan hmeichhe World Cup semi­final lut turin Inrinni zan khan Canada chu 2-1 in an hneh. England hian minute thum chhungin goal hnih an khung a ni.

Hmeichhe World cup hnuhnung pahnihah England hi quarterfinal-ah an tla ve ve a, kum 2001 khan France chu penalty-ah an hneh loh bakah kum 2007 khan United States chu 3-0 in an lo hneh lo tawh bawk. Tunah chuan an record duhawm lo tak hi an thai bo ta.

Khup hliam vanga kar kaw chhung zet a inkhelh theih loh hnuah Jodie Taylor a lo kir a, tun ṭum World Cup inkhel bula a ṭan hmasakna berah Taylor hian minute 11-na lekah an hmahruaina goal a khung.

Goal hmahruai an thun aṭang­a minute thun naah Fara Williams freekick pet ṭha tak mai chu Lucy Bronze chuan an goal hnihna turin chiang zet maiin a tauh lut bawk.

First hlaf tawp hma minute thum chauh a awm tawh tihah Canada tan captain Christine Sinclair chuan goal khung veiin England goalkeeper Karen Bardsley tan tih theih a awm lo.

England hian an goal thum­na an khung teuh hle mai a, freekick pet thiam Williams pet chu Stephanie Houghton chuan lo tauhin goal bar a tauh per hlauh.

World cup thlengtu Canada lam hian secondhalf-ah lehthal tumin bei let ngial mah se Eng­land an fimkhur tawh a, a tawp thlengin goal dang a lut zui tawh lo.

July 2 khian champion lai Japan leh England te hi final luh inchuhin an inkhel leh ang. Japan hian quarterfinal-ah Australia chu goal khat faiin an lo hneh tawh a ni.

US leh German pawh an tlang

Vawi hnih champion tawh United States pawhin vawi thum champion an tumna kawngah semifinal lut turin Asia team ṭha China chu sikhat faiin an hneh.

Lansdowne Stadium-a inkhel­ah hian Captain Carli Lloyd chuan he inkhela goal awmchhun hi a khung. US hian a zawiin vawi sarih semifinal an luh na a ni chiah bakah China lakah vawi 25 hnehna an chan na chiah a ni bawk.

Inkhel dangah Germany leh France te chu goal khat ve ve khungin an inhnehtawk. Second half-a Louisa Necib goal khung chu hun tawp hma hretin Germany tan Celia Sasic chuan penalty aṭangin a sut.

Penalty shootout hmangin chak zawk zawn a ni a. German hi 5-4 in an chak. Thawhlehni khian Olympic Stadium-ah USA leh Germany te hi an inkhel leh ang.