Belinda Bencic a champion ve ta

Inrinni khan Eastbourne International final-ah Belinda Bencic chuan Agnieszka Rad­wanska hnehin a champion a, Women Tennis Association (WTA) nomawi a vawi khat chawina a ni. Vawiin aṭanga khelh ṭan tur Wimbledon-ah pawh a inlan ang.

Kum 18 chauha upa la ni mah se Swiss tleirawl Bencic hi final boruak sangah pawh a buai lo hle a, a khingpui kum 26-a upa Agnieszka Radwanska chu 6-4, 4-6, 6-0 in a hneh a ni.

Final a chak lo Radwanska hi he hmunah hian kum 2008 khan a lo champion tawh bakah kum 2012 khan Wimbledon final a khel a, mahse tawnhriat nei lo zawk player lakah a chak lo.

Kum li mi chauh a nih lai aṭanga tennis khelh zir tawh Bencic hian kum 2013 khan Junior French Open leh Wimbledon-ah lo champion tawhin tunlai hmeichhe tennis player ngaihven hlawh ber te zinga mi a ni chho mek.

A vawi khat nana WTA nomawi chawitu Bencic chuan, "Ka suangtuah ṭhin chu a thleng dik ta, vawiin hi ka dam chhungin ka theihnghilh ngai tawh lo ang. Ka hlim takzek a ni," tiin a sawi.

Swiss mi tho Grand Slam vawi nga champion tawh Mar­tina Hingis chuan an in­khel hi a hmunah a en a, Hingis leh Bencic hi an khaikhin ṭan der tawh.