Renault chungah Horner a lawm lo

Red Bull boss Christian Horner chuan an car engine siamtu Renault chunga a lawm loh thu a sawi. An engine hman V6 turbo engine chu Formula 1 team dangte el phak lo nia a hriat thu a sawi bawk.

An harsatna tawh ang tho hi McLaren chuan Honda lakah an tawk ve mek nia a hriat thu a sawi tel bawk a ni.

Tun hma deuh chuan Red Bull leh Renalut hi an inkawp rem em em a, kum 2010 aṭanga 2013 thleng kha chu tuma el phak lohin For­mula 1 construction cham­pionship-ah pakhatna an ni. Amaherawhchu nikum aṭang khan Mercedes hnuaiah an awm ṭan.

Kuminah beiseina sang tak nen season ṭan ve mah se intlansiak vawi riat awm tawh aṭangin palina an ni phak ṭawk a, point 55 hmu mekin hma­hruaitu Mercedes erawh­in point 328 zet an hmu tawh thung.

Kum 41-a upa English pa chuan, "Ka ngaihdan chuan tuna Renault leh Honda-in engine min chhawpchhuah sak ang hi chu Formula 1 inel nan hman tlak a ni lo. Kan harsatna hi tun maia chinfel theih ni lo mah se a rang thei ang bera a thlakna tur emaw a tih chakna tur kan ngaihtuah a ṭul ang. Tuna kan dinhmun ang hi chuan Mercedes leh Ferrari te elphak ngaihna a awm lo hrim hrim," tiin a sawi.