Mipui mit fukna tur leh ngaihven hlawh bik turte

Khawvel tennis tournament upa ber Wimbledon chu vawiin tlai hian khelh ṭan a ni dawn ta. Mipa leh hmeichhiaah player ngaihven hlawh leh mipui mit fukna tur bik an awm leh dawn a, chung zingah chuan Serbian Novak Djokovic leh American Serena Williams te chu a langsar ber pahnih an ni ang.

Mipa player ngaihven hlawn turte:-

Novak Djokovic

World no. 1 Djokovic hi champion lai a nih bakah seeded pakhatna a nih avangin kuminah pawh hian champion tura rin awm ber chu a ni. Serbian tennis star hian Grand Slam vawi riat a champion tawh a, chung zingah chuan kum 2011 leh 2014-a Wimbledon a champion tawh a tel.

Kumin Grand Slam tournament hmasa ber Australian Open-ah a champion bakah French Open final a thlen avangin player dangte tan chuan hmachhawn a châkawm loh hle ang.

Roger Federer

Khawvel tennis player zingah a ropui ber thlan theih ni chiah lo mah se Grand Slam vawi 17 zet champion tawh Federer hi mi tam takin khawvela ṭha berah an ngai. Kum 33-a upa ni tawh mah se a coach Stefan Edberg nen ṭangkawpin kuminah hian player hlauhawm ber pawl chu a la ni chiang ang.

Kan theihnghilh loh tur chu Swiss super star hian Wimbledon nomawi hi vawi sarih zet a lo chawi tawh avangin kumninah hian a vawi riat nan a chawi leh a nih pawhin a mak lo ang.

Andy Murray

British mipuiin an mahni ramah a ram leilung fa ngei champion hmuh an duh ṭhin. Kum 77 chhung zet an nghah hnuah kum 2013 khan Murray chu champion in an duh an nghak chhuak. London olympic 2012 gold medallist hian kuminah hian ṭantu a ngah leh dawn tih a chiang.

British mupuite atchilh Andy Mur­ray hi seeded pathumnaah a awm a, a chak chho zel a nih chuan semi­final-ah Djokovic emaw Federer a hmachhawn a ngai ang.

Stan Wawrinka

Player langsar leh hrawl pui pui an awm karah thla hmasa khan Wawrinka hian French Open chanpion nomawi a chawi. A ball vuak na tak mai hi a hmang ṭangkai leh thei a nih chuan player tawh khirh ber pawl a ni ang. A hnam pui Federer ang bawka backhand nei ṭha a nih avangin a khelh fuh ni chuan tupawh hneh thei turin a tling tawk.

Rafael Nadal

A dam ṭhat a, duhtawka a inkhel tak tak mai hi chu tu tan mah dan ngaihna a awm lo. Kum 29-a upa Nadal hian tun hnaiah beisei phak chaih lo mah se tournament lian leh boruak sangah chuan a buk a rit leh viauin a rinawm. Kum 2008 leh 2010 te khan helai hmunah hian hnehna a lo chan tawh avangin a vawi thum nana champion leh thut maithei.

Tun season-a a chet ṭhat tawk loh avangin seeded 10-na a ni pha hram. Wimbledon-ah bik seeded a nih hniam ber ṭum a tawng a ni. Nadal hi a chak chho zel a nih chuan last 16-ah a sang pali zinga mi tu emaw ber nen an inhmachhawn a ngai ang.

Hmeichhe player ngaihven hlawn turte:-

Serena Williams

Ka ṭhat zia ti lang chiang turin nomawi chawi belh kher ka ngai tawh lo ti ngam ngat kum 33-a upa Williams hian Grand Slam nomawi nawi 20 zet a chawi tawh avangin a ṭhat zia chu inhrilh nawn kher a ngai lo ang. French Open champion hlim a nih bakah World number 1 nilai a nih bawk avangin hmeichhe zingah chuan a buk a rit leh berin a rinawm.

Petra Kvitova

Kum 25-a upa Czech Republic star Kvitova hi champion lai a nih avangin mipui ngaihven tur a ni tih chu a chiang. Nikum bakah kum 2011 khan he hmunah hian a lo champion tawh avangin midang tan a nomawi chhuhsak hi a awlsam hauh lo ang.

Simona Halep

Kum 23-a upa Halep Grand Slam la champion lo chunga World number 3 ni thei a nih avangin dah hniam ngawt a thiang bik lo ang. WTA nomawi 11 lai a chawi ve tawh avangin tum ṭumah hian a vawi khan nan Grand slam a champion a nih pawhin thil mak a ni hran lo ang.

Maria Sharapova

Russian star Sharapova hriat­thiam a harsa ṭhin hle. Ṭha tak tak a a khelh tluan laiin ho angreng takin a chak lo leh khut ṭhin. Amaherawhchu Grand Slam paliah a champion kim vek tawh avang hian a khelh ṭhatni chuan khawi hmunah pawh chak thei a ni tih a chiang. Kum 17 mi chauh a nih laiin Wimbledon-ah hian a lo champion tawh a ni.

Seeded siam dan

Mipa leh hmeichhe single hi player 128 ve ve in an khel ṭhin a, seeded hi international ranking mila siam a ni. Kum 2001 aṭang khan mipa leh hmeichhe single-ah hian player 32 ve ve seeded-ah dah an ni a, double inelnaah team 16 te chu seeded an ni ṭhin bawk.

Mipa single-ah hian ATP Ran­king-a a sang player 104 te chuan direct-a an khelh nghal theih laiin hmeichhe lamah chuan player 108-in direct-in an khel thung. A bak hmun ruak la awm hi chu player naupang leh hnufual deuh ten qualifying hmanga inelna neiin an hnawhkhat ṭhin.