Bundesliga ṭan a ni leh dawn ta Ṭum dang zawng aiin German league en a châkawm

German rama football inelna sang ber Bundesliga hi Champions League champion Bayern Munich awmna a nih avangin sawi hniam theih a ni lo a, tun season Premier League hlutna belhchhahtu Timo Werner leh Kai Havertz te hi German club aṭanga sengluh an ni. Zanina khelh ṭan tur Bundesliga 2020-21 season-ah hian chanchin ngaihnawm tak tak a inphum ṭeuh a, tun ṭumah hian a langsar chauh kan chhawp chhuak dawn.

German Football-in season ṭan nan DFB Pokal an hmang a, Bayern Munich erawh Champions League vanga season an hman rei avangin an khelh hun an sawnsak. Zanin dar 12:00 hian Allianz Arena-ah Schalke 04 an mikhual dawn a, Bavarians tan season thara an match hmasa ber tur a ni ang.

Bavarians-in Champions League final-a French champion Paris St-Germain an hneh khan Hansi Flick-a hnuaiah inelna lian pathumaah nomawi an chawi. Season tharah erawh treble champion team an kim dawn tawh lo. Barcelona-in Philippe Coutinho an la let leh tawh a, Ivan Perišić leh  Alvaro Odriozola te Inter Milan leh Real Madrid-ah an let tawh bawk.

Champions League nomawi an chawi thei nana player pawimawh tak Thiago erawh an chan fel, Spanish midfielder hi Premier League champion Liverpool nen an inrem fel tawh a, manager Flick-a'n season tharah chuan a player pawimawh ni ṭhin tel loin ruahmanna thar a neih a ngai dawn tihna a ni.

Manchester City aṭangin Bayern-in an player duh tak Leroy Sane an lalut a, German club lianin German player ṭha an chang thei hi 'Big Signing' a ni. Chutihrualin hmabak erawh a ko, Bayern hi Bundesliga leh DFB Pokal-ah chauh an lungawi lo, Champions League an duh tel.

Bayern striker duhlai Robert Lewan-dowski chuan, "Thil ropui tak kan ti a, kan hnathawh chhunzawm tur chuan kan thil tihte theihngilh a ngai thung. Sane pawh hian hmasawn a mamawh a, theihna sang tak a neih avangin tun hmaa a la tih theih loh thil thar ti turin ka beisei a ni," tiin a sawi.

Bundesliga atan bika thlir chuan Bavarians squad hi season hmasa nen a danglam chiam lo a, Hansi Flick-a rorelna hnuaiah Philippe Coutinho, Perisic leh Thiago te league-ah an khel tam tawk lo. Bayern hian league-a an player pawimawh te an la chelh vek bakah Sane an lak belh tiin a 

sawi theih.

Bayern hian Schalke first keeper Alexander Nubel chu free-in an lalut a, kumin kumtir khan an tichiang tawh. Germany no. 1 Manuel Neuer-a'n a dam ṭha a nih chuan khelh reng a duh thu a sawi nghal avangin Nubel-a tan khehna hmun chan a har ang. Nikum khan Neuer vawi 51 zet a inlan laiin second keeper Sven Ulreich chu vawi khat chauh 

a inlan.

German manager Flick-a'n a player thar Sane-a chu hmun pawimawh a chantir nghal a rinawm a, bul ṭantu tur dangte pawh nikum lama a hmanthiam ngai bawk an nih a rinawm. Chutihrualin tlarhma lamah rawlthar duhawm Joshua Zirkzee leh Jann-Fiete Arp te an kawl a, hun tawp lamah Lewandowski tan hahdamna hun an siam thei ang.Bayern Munich elpui tur bera ngaih theih chu Borussia Dortmund an ni a, ṭum dang zawng aiin vawi nga Bundesliga nomawi chawi tawh team hi an ṭha dawn.

Dortmund hi position tinah an ṭha rual ta hle. Tlarhnungah PSG aṭangin Thomas Meunier an lalut a, Real Madrid aṭanga an hawh Achraf Hakimi a chhuah tak avangin a thlakna tur a ni thei ang. Tlarhnungah hian Mats Hummels, Dan-Axel Zagadou, Manuel Akanji leh Raphael Guerreiro te an awm avangin Bundesliga atan chuan an ṭha tawk hle.

Tlarhma lam hi Dortmund inchhuanna a ni a, Norwegian striker Erling Haaland awt lo club an awm lo ang. Captain Marco Reus pawh a dam ṭhat phawt chuan khawvela ber kai pha zinga mi a ni a, a dam tawh tih finfiah nan DFB Pokal-ah goal a khung nghal. Tlarhma chawm tur hian midfield-ah player beiseiawm rual Jadon Sancho, Julian Brandt, Gio Reyna leh Jude Bellingham te ho an awm. An hming thlir mai chuan Bayern ai pawhin an khel en a châkawm zawk.

Amaherawhchu Dort-mund danglamna erawh sum siam nan club an hmang nasa a, player naupang zawk chher hriamin manto zawkin club dangah an hralh. Bavarians erawhin a ṭha ber ber an kawl thei a, player tawnhriat nei ṭha leh vanglai hmang mek an kawl ṭhin avangin Dortmund tan el phak a harsa ang. 

Season liam ta khan Dortmund hnuaiah RB Leipzig, Borussia Monchengladbach leh Bayern Leverkusen te an awm a, heng ho pawh hi vanneih chuan nomawi chawi thei an ni. Chutihrualin Bayern Munich leh Dortmund hi an chesual viau a nih loh chuan club dang tan inrawlh a rem rih lo.

Bundesliga-ah player beiseiawm tak tak an inzep nual - Werder Bremen striker kum 20 mi Josh Sargent hi chhinchhiah a sual lo. Germany-in 1990 World Cup an champion ṭuma captain Lothar Matthaus pawhin American striker hi a tlan chak avang leh a finishing ṭhat avangtein a dah sang hle.

RB Leipzig-in defensive midfeld leh right back-a an chhawr kawp Tyler Adams hian season liam ta khan match 14 chauh a khel a, kum 21 mi chauh a ni tih hriat a ṭha. American player hi DFB Pokal-a Nurnberg an hmachhawn ṭum khan man of the match-ah thlan a ni a, hetah hian midfield angin a khel. Leipzig coach Julian Nagelsmann chuan 'quarterback' ti hialin Adams hi a fak a, hmabak a nei êng hle.

Europe club lian te pawhin an enthlak tawh Leon Bailey hi season liam ta khan Bayern Leverkusen tan match 22 a khel a, vawi 12 chiah bul a ṭan. Kum 23 mi Bailey khelh tlem chhan hi a inhliam vang a ni a, Jamaican winger hi a dam ṭha a nih phawt chuan Kai Havertz hnung zuiin Europe club lian zawk a la zawm ngei ang.