Copa America Penalty-ah Argentina chak; Brazil chak lo
Lionel Messi telna Argentina-in hun pangngaiah goal khung lo mah se penalty shootout-ah Colombia lakah an vannei. Neymar tel lohna Brazil erawh Robinho goal an humhim zawh loh vangin penalty shootout hmangin Paraguay an hneh lo. Copa America semifinal-ah Argentina leh Paraguay an inhmachhawn ang.
South America ramte inelna sang ber quarterfinal-ah extra time a awm loh avangin ram tenau zawk tan football-a sulhnu nei ṭha zawk barakhaih hi thil theih a ni a, minute 90 khelh zawha penalty shootout neih nghal a nih avangin kartawpa inkhel result hi a mak hran lo.
Argentina an chak
Inrinni zingah Argentina leh Colombia te Estadio Sausalito-ah an inkhel a, Chelsea nena sawi zawm Colombia striker Radamel Falcao chu bench-ah a ṭhu.
Arsenal-in Petr Cech an la lut a, Colombia keeper David Ospina-a'n field chhungah Arsene Wenger hnehah a ṭha tawk tih a phochhuak. Ospina hian Manchester City striker Sergio Aguero goal khung tur chu hnai tak aṭangin a dan sak a, a per chu Lionel Messi zawnah tak tla mah se Arsenal keeper hian a dang leh hman tho.
Second half-ah Radamel Falcao lut hnuah Colombia attack a na chuang lo a, Argentina bawkin inkhel an thunun. Minute 10 chiah a awm tawh tihin Real Madrid leh Manchester United nena sawi zawm Argentine defender Nicolas Otamendi-a volley chu rang hle mah se Ospina-a'n a dang hman.
United winger Angel di Maria thlaktu Ezequiel Lavezzi-a'n a ball khawih hmasa berah ball fing tak a pe lut a, substitute Carlos Tevez-a khawih hmain Colombia defender Cristian Zapata-a'n anmahni goal lamah a pet a, Jeison Murillo-a'n goal line aṭangin a pet chhuak hman hlauh.
Minute 95 chhungin goal a lut lo a, penalty shootout-ah player 14 zetin penalty an pet a, Argentina tana chakna goal khungtu chu Carlos Tevez a ni.
Brazil an chak lo
Pathianni zingah Brazil leh Paraguay te Ester Roa Rebolledo Stadium-ah an inkhel a, Dani Alves-a cross chu Robinho-a'n a khung a, minute 15-naah Brazil 1-0 in hma an hruai.
Robinho hi Neymar-a'n red card a hmuh hnuah Brazil tan Robinho a ṭangkai a, ram tana vawi 99 a inlanah goal a khung. Santos aṭanga lar chhuak Robinho hian kum riat liamta khan Copa America-ah goal ruk a khung a, final-ah Argentina hnehin an champion. Kum 2011-ah erawh Robinho hian goal khatmah a khung lo a, quarterfinal-ah penalty shootout-ah Paraguay an hneh lo.
Tun ṭumah hian Robinho a vannei chuang lo, second half-ah Brazil defender Thiago Silva kutin ball a fuh vangin penalty a chawi a, minute 72-naah Derlis Gonzalez hmangin Paraguay-in an siphurh an sut.
Liverpool player thar pound maktaduai 29 man Roberto Firmino-a'n Brazil chak tumin theihtawp mah se ball a chang fuh thei lo a, a langsar lo hle. Hoffenheim player hlui lansarh lai ber chu an thlak dawn laia, fourth official-in electronic board-a a jersey no. 11 a rawn hmeh en kha a ni.
Penalty shootout-ah Brazil an chak lo a, kum li liamtaa an hneh loh Paraguay lakah bawk an tlawm. Brazil hian match li an khelhah goal nga chauh an khung a, hetihlai hian inelna thlengtu Chile-in goal 11 lawih an khung thung.
Argentina-in semifinal-ah an hmelma Brazil hmachhawn turin an inpeih a, Dunga kaihhruai Brazil-in semifinal an thleng phak tak loah chuan semifinal-in ngaihven a hlawh lo sawt ang.