Referee Development Course a hlawhtling

Kar khat chhung awh MFA/AIFF Referee Development Course chu Inrinni khan zawh fel a ni.

Football Referee Development Course-a telte zirtir leh endik turin AIFF-in Supriyo Bhattacharya (Kolkata) leh Ch. Mohanty (Odhisa) a rawn tir a, Mizo referee-te chêt danah endiktute hi an lawm hle.

AIFF referee instructor Mohanty chuan, "Mizoram-a ka rawn kal hmasak ṭumin referee pali panga lekin fitness test an patlang a, tunah erawh 30 chuangin fitness test an patlang a, hmasawnna nasa tak a ni. Fitness bakah theory leh practical-ah hmasawnna hmuh tur a awm a, a lawmawm hle a ni," tiin Mizo referee ten hma an sawn thu a sawi.

Referee Development Course hi June 22 khan ṭan a ni a, hming ziak lut 57 aṭangin mi 47 in an chhim a, mi 40-in exam an hmachhawn thei bawk. Aizawl pawn aṭanga kalte senso hi MFA-in an tumsak a, Inrinni tlai khan Lammualah course-a tel zawng zawng hnehah certificate hlanna hun neih a ni.