Indian Premier League Chibai

Kan chenna leilung inher ṭhin dan pangngai ang chu nise, kum 2008 aṭanga kumtin chhum lo chat loa Vau thla leh Ṭau thla vela BCCI-in a huaihawt ṭhin Indian Premier League vawi sawmpathumna chu kumin Ṭomir thla chawhma lama zawh fel tawh tur anga ngaih a ni a. Khawvela infiamna league ṭhang duang tak, cheng tluklehdingawn tam tak virvelna IPL meuh pawh Covid-19 vangin an duh hunah ṭan theih a ni lo.

Kan chenna khawvel hi a famkim miau si lo a, duh leh suangtuah anga thil hi thleng diak diak thei vek ni hek suh, a chang chuan a ṭha ber dawttuah te a lungawi a ngai ṭhin. India ram ngeia khelh ṭhin Indian Premier League pawh ram dangah khelh a ṭul ta a, khelh loh ai chuan a khelhna tur dap a ṭha si. Hun rei tak kan nghah tawh chu kan nghak chhuak dawn ta. September 19, Inrinni zan hian Sheikh Zayed Stadium, Abu Dhabi-ah Mumbai Indians leh Chennai Super Kings ten match hmasa ber an khel ang.

Silly Point hmasa lam chhuakah IPL huaihawt theih a nih loh thu te, Covid-19 hrileng vanga  a ṭum 1-na tur kumina mi chu boruak anga thamral mai thei dinhmuna a awm thu te kan tarlang tawh a nih kha.

Khatia India sorkarin IPL chu kumin atan mahni ram chhuaga huaihawt theih a ni dawn lo tih BCCI hnena chiang taka a hrilh tak avangin sum tam taka an hlawkpui theihna hun ṭha a ni tih inhriain, Covid 19 in a tihbuai ve vak loh ram UAE, Sri Lanka, New Zealand te chuan BCCI hnenah an thlen theih thu an hrilh nghal.

Ngun taka a enfiah tur Committee-ten hun engmaw chen an han ngaihtuah hnuah, kuma 2014 India inthlanpui avanga a tournament tir lam hnehsawh taka lo thleng tawhtu UAE-ah chuan a ṭum hnihna atan IPL Khawmpui Pandal sak zai rel a lo ni leh ta a ni. Tin, hriatna tizauah, kum 2009 khan, India inthlanpui avang thoin, IPL pumpui kha South Africa-ah nghah a lo ni tawh bawk.

Cricket Association of Mizo-ram general secretary leh IPL Governing Council member Mamon Majumdar  chuan, "IPL khelh theih nan hian engkim peih fel a ni tawh a, a inkhel tur te bakah, a huaihawtna tura pawimawh tha leh mihringte an buaiin an hah em em a, an zarah IPL ṭum 13-na, chu tluang taka khelh theih beisei a ni.  Dubai, Sharjah leh Abu Dhabi khawpuia stadium pathumten hnehsawh takin an thleng thei dawn a ni" tiin Vanglaini Silly Point a hrilh. Mamon Majumdar hi BCCI president Sourav Ganguly hnung zuiin IPL khelhna tur hmun endikin UAE-ah a awm mek.

Covid-19 hrileng hian infiamna dang ang thoin cricket chhungkua hi a chhaih buai hle. Him leh felfai thei ang bera mi thiamten an duan Bio Bubble nena  IPL team leh a kaihnawih dang zawng zawngte chu UAE leilung an rah aṭangin vil nghal ni mah se Chennai Super Kings team a member 12 ngawt mai chu an han positive nghal phawt mai a. Luhaina tur leh mut tui lohna tur thuneitute tan chuan a va han tam dawn em. He thu buatsaih lai hi chuan a tam zawk chu an dam leh tawha hriat a ni.

Ṭum dang angin inkhel entu mipui sing tel zi hut hut mai hmuh tur a awm thei dawn lo erawh TV lama lo entute tan hriat lawk nise. Chutihrualin Champions League, Premier League leh infiamna dangah entu awm lo inkhel kan hmu nual tawh a, thil thar a ni tawh lo ang.

Broadcaster Star Sports lam pawh insiamrem ngai tam tak awm mahse, tluang takin UAE lamah an inrem fel thei a. Chutirual chuan commentary team tur lam pawh a hmuna kal pawl ṭhenkhat awm mah se Mumbai lam aṭanga lo che pawl an awm a ngai ve thung dawn a ni.

Beisei bo deuh hnua thil a rawn inchhawp leh te hi hringnun tinuamtu pakhat hi a ni ve a. Chutiang bawkin IPL 2020 chu chan mai thei dinhmuna kan awm tawh hnua, la tih ngai miah lo Favang lama he khawmpui kan han chhim thei tur te hi a lawmawm dan a dangdai ve hrim hrim. 

IPL hmachhawn turte hun rei tak an in quarantine hnuah practice leh inpuahchahna ṭha tak an nei thei tawh a. Inrinni zan aṭangin Sheik Zayad Stadium, Abu Dhabi lamah Star Sports kaltlangin cricket khawvel chuan mit an len ang a.  IPL thawnthu a champion ngun ber team pahnih Rohit Sharma kaihhruai Mumbai Indians leh hmanni lawka kan Silly Point hmun luahlumtu MS Dhoni hoa khel tur Chennai Super Kings te a khuhhawnna inkhel hmasa berah an inhmachhawn ang. 

Thil dang zawng zawng dah ṭhain, cricket tui mite tan boruak thar kan hip turah i ngai phawt ang.. IPL khawmpui 2020 chibai vek ule.