League Cup Leeds leh Saints an chak lo, Everton an chak

Premier League ṭan niah Leeds United-in champion lai Liverpool hmachhawnin inkhel ropui tak an lantir a, point erawh an hlawh chhuak lo. Marcelo Bielsa hote hi an khelh dan avangin dah san an hlawh a, amaherawhchu League Cup-ah Hull City hneh loin an tla.

Nilaini zan Elland Road-a inkhelah Hull City tan Mallik Wilks-a'n minute 5-na lekah a khung a, Leeds-in injury time-ah Ezgjan Alioski hmangin an sut hram. Penalty hmanga chak zawn a ni a, Hull-in 9-8 in hnehna an chang. Inkhel dangah Brentford-in St Mary's Stadium luhchhuahin Southampton 2-0 in an hneh a, Premier League club dang Fulham leh Everton te erawhin Ipswich Town leh Salford te an hneh thung.

Leeds tlarhmaah an player manto Rodrigo a rawn inlan a, hriat tel tur erawh Spanish forward hi Liverpool nen bul a ṭan lo a, a luh hnuah penalty a chawi. Marcelo Bielsa-a'n inelna a la thutak tawk lo a, Premier League champion a hmachhawn ṭum aṭangin starting eleven a thlak hlawk - Leeds B Team tia sawi theih an ni.

Leeds player hlui Mallik Wilks-a'n hun thawl leh hmun awl a neih avangin minute ngana lekah box pawn aṭangin a duh thalin a pet a, Leeds defender-in an khawih kawi bawk avangin keeper  Kika Casillas tan dan ngaihna a awm lo. Hull player Wilks hi a khel ṭha tluan a, Leeds tlarhnung tan a hnawksak hle. 

Hun tawp lamah Leeds-in an nawr na lehzual a, Hull City-in ball an 'clear' lawk theih loh an tuar. Injury time-ah Ezgjan Alioski-a'n ṭha zetin a pet goal. Hun a tawp zui avangin penalty an pet nghal. Leeds-in an pet hmasa a, Rodrigo-a'n a pet goal a, amaherawhchu a vawi hnihna pettu siphurh sutna goal khungtu Alioski-a'n a hlah thung.

Amaherawhchu Leeds keeper Casilla-a'n Hull tana a vawi thumna pettu Lewie Coyle pet a dansak. Sudden Death thlengin an pet goal chho zel a, Leeds tana a vawi 10-naa pettu Jamie Shackleton pet chu Hull keeper Matt Ingram-a'n a dansak a, Alfie Jones-a'n Tigers chakna goal a khung.

Hun pangngaia 1-1 a an inhnehtawk hnuin penalty shootout-ah Hull City 9-8 in an chak a, third round-ah London club West Ham United an hmachhawn ang.

Leeds United manager Marcelo Bielsa chuan, "Kan khel ṭha lo a, goal kan venhim ṭhat loh bakah kan goal nawr a ṭha tawk lo. Inelnaa tel chhunzawm zel kan duh a, kan chak lo hi pawi ka ti, ka thiam loh a ni," tiin a sawi.

Argentine manager chuan sawi chhunzawmin, "Kan inbuatsaihna thlir chuan tun ai hian kan khel ṭha thei turah ka ngai. Coach-in player a thlan chuan chak theihna tur player a thlang ṭhin a, Hull hneh thei tur player ka thlangah ka ngai. Player ka thlan te team angin an inthlawp ṭha tawk lo a, kan chak lohnaah hian mawhphurhtu ka ni," tiin midang mawhpuh a tum lo.

Everton-in Premier League-ah Tottenham Hotspur hnehin bul an ṭan a, Salford tan pawh an ṭha mah mah. Toffees hian vawi nga zet woodwork an tih per a, Carllo Ancelotti-a'n player ṭhahnem tak a thlak chungin Michael Keane, Gylfi Sigurdsson leh Moise Kean te goal hmangin 3-0  in an chak.

Toffees tana chanchin lawmawm lo awmchhun erawh first half-ah inhliam vangin defender Jarrad Branthwaite thlak a ngai a, Barcelona defender hlui Lucas Digne-a'n a thlak. Carlo Ancelotti chuan, "Kan rilru put hmang a dik a, kan khelh danah a lang chhuak," tiin a naute fak.

Fulham-in Premier League match hmasa berah Championship-a top scorer Aleksandar Mitrovic bench-ah an ṭhuttir a, Arsenal lakah 3-0 in an chak lo. Ipswich Town nen Mitrovic hian captain armband rawn hrengin minute 38-naah goal awmchhun a khung. Serbia international hian Kenny Tete cross a tauh lut a, London club tana a goal 50-na a ni.

Southampton boss Ralph Hasenhuttl-a'n Premier League match-a bul ṭantute zing aṭangin player pakhat chiah thlak mah se Brentford lakah 2-0 in an chak lo. Championship club tan hian Christian Norgaard (40') leh  Josh Dasilva (45+1') ten an khung. Saints tan Nathan Redmond, Che Adams leh Danny Ings te lut mah se goal zawnah vawi thum chauh an pet.