Serie A Thlirlawkna Pirlo hoa inlan tur Juventus

Italy rama football inelna sang ber Serie A-ah hian hun rei tak chhung a zawna rorel thei an awm ngai meuh lo. 1930-a league khelh ṭan aṭanga season nga chhung chu Juventus an champion a, a hnu lamah season nga aia rei champion zawn thei an awm lo rei hle.

Tunah erawh thawnthu ziah danglam mek a ni, 2012 khan Old Lady hian AC Milan kut aṭangin Serie A title an la a, a hnu lamah an hum ziah - season tharah hian Scudetto an la leh a nih chuan a zawna season 10 an lakna a ni ang, tun hma lama record lo awm tawh chu a let thawkin an khum ang.

September 19, Inrinni zanah 2020-21 season Serie A match hmasa ber chu Fiorentina leh Torino ten an khel dawn, champion lai Juventus chuan Pathianni zanah Sampdoria mikhual chungin league an khuh hawng ve bawk dawn a ni.

Juventus junior team enkawl tura ruat a nih hnu lawkah Andrea Pirlo chu senior team enkawl tura tih a ni zui. Player a nih laia hlawhtling tak Pirlo hi coaching lamah eng ang tak nge a nih dawn hriat a la ni lo, a player neih dan chhut erawh chuan champion tura rinkai an ni tho.

Turin club hi Maurizio Sarri-a'n league nomawi chawipui mah se a dinhmun humhim nan a tawk zo lo, amah thlaktu Pirlo chungah mawhphurhna a lian tih a chiang - Serie A bakah Champions League nomawi chawi ngei an duh dawn.

Cristiano Ronaldo leh Paulo Dybala te an awm miau avangin Juve hi team dang tana hmachhawn chakawm loh tak an ni. Chutihrualin tlarhnung lama an rinrawl Giorgio Chiellini (36 years) leh Leonardo Bonucci (33) te hi an vanglai an pel tawh, rawlthar Matthijs de Ligt chungah mawhphurhna a lian ang.

Season hmasa khan Inter Milan hian champion Juventus an phak lohna chu point khat chauh a ni, chutihrualin Juve hi khelh hmabak pahnih nei chungin an champion tawh a, an dinhmun a chian hnuah point an hloh avangin Inter nena inhnaih an ni.

Hri leng vangin buaina a tam a, a bik takin Antonio Conte enkawl Inter hi an buai zual - Europa League an khel a, midang aia an khelh tlai avangin season tawp lamah an inhnawhtawng nasa hle. Season tharah chuan a boruak a danglam tawh tura ngaih a ni a, Juve tan an hnawk pha viau ang.

Italian manager hian Inter a chhuahsan tura sawi thawm a awm hman, mahse club thuneitu nen an inbiak hnuah a cham. Chelsea manager hlui hi an duh ang thlawpna an pe dawn niin a lang, a player neih sa Romelu Lukaku leh Lautaro Martínez an inkawp rem avangin team dang an hlau dawn lo.

Ronaldo leh Robert Lewan-dowski ten season duhawm an hmang a, mahse goal khung hnem lamah tluk loh an nei. Serie A match 37 aṭanga goal 36 khung thei Ciro Immobile kutah European Golden Boot hlan a ni.

Italian forward hi club lian tam takin an hnena khel turin an duh, amaherahwchu Lazio tan rinawmna thu a ziak a - contract a pawtsei fel tawh. Season thar atan Fenerbahce atangin striker Vedat Muriqi an la thar a, inkhel hmuhnawm an chhawp chhuak leh ang.

Nikum khan Simone Inzaghi naute hian a tir lamah chuan Juve leh Inter an elphak, chutihrualin nomawi chawi tur erawh chuan season chawhnu lamah zuih loa an kal mar theih a ngai tawh ang. Season hmasa an tawnhriat aṭanga an inzir chuan Juve leh Inter nen bawk an inel leh a rinawm.