A vawi 16 na’n James an thlang

Nilaini zan khan All-NBA First Team chu 2019-20 atan thlan fel a ni leh ta a, a vawi 16 na‘n LeBron James a tel - record nei ṭha ber dinhmun a chelh nghal bawk.

Los Angeles Lakers forward LeBron James leh Milwaukee Bucks forward Giannis Antetokounmpo te hi vote thlaktu zawng zawngin 'First Team' atan hian an thlang vek. Anni bakah hian James Harden, Anthony Davis leh Luka Doncic te chu a ṭha zual panga zingah hian an tel.

All-NBA Team atana thlan hnem ber ni ṭhin chu Kareem Abdul-Jabbar, Kobe Bryant leh Tim Duncan te an ni a, anni pathum leh James hi vawi 15 ṭheuh an lang ṭhin, tunah erawh James hi a lan belh leh tak avangin record thar hi a siam.

American star James hi First Team atan vawi 13 thlan a ni tawh a, Second Team atan ṭum hnih lang tawhin Third team zingah vawi khat a lang ve tawh bawk; a theihna a san bakah a taksa a la fit ṭhat avangin ama record siam sa hi a belhchhah zel a nih pawhin a mak lo ang.

James awmna Lakers hian tun hnai season 10 chhunga a vawi khat nan Western Conference finals an lut. Inrinni zing dar 6:30 hian Denver Nuggets nen game 1 an khel dawn a ni.