Rome khawpuiah Halep a chak

Italian Open khelh laiah hmeichhe singles seeded pakhatna Simona Halep chuan a match hmasa berah Jasmine Paolini chu 6-3, 6-4 in a hneh a, hun rei tak hnua tournament khel leh chauh a nih avangin Halep hian tun hma a la phak lo.

Nilaini zan khan kum 28 mi Halep hian wildcard hmanga inlan Paolini lakah a service vawi nga ngawt a hloh. Mahse a khingpui service hi ṭum riat zet a chhuhsak let thung a, harsa angreng takin hnehna a chang.

Covid-19 vanga US Open khel lotu Halep hian Rome khawpuia a match hmasa berah hian unforced errors vawi 15 a neih laiin vawi 14 chauh winners a vaw chhuak thung, player ṭha dang a hmachhawn huna hnehna chang tur chuan insiamṭhat a mamawh hle.

World number 2 Halep chuan, "A tir aṭangin ka tluang lutuk lo, kan inkhelh chhung zawng khan fuh taka kal lai ka nei lo hialin ka hria. Ka khel ṭha tawk lo tih chu ka pawm, chutihrualin hnehna ka chan tho avangin ka lawm," a ti.

French Open inbuat-saihna Italian Open-ah Halep hian final vawi hnih a lut tawh, nomawi erawh a la chawi lo. Kumin hian Paris khawpuia an zin luh hmain hlawhtlinna chan ngei a duh, a match lehpek atan zanin hian Amanda Anisimova hnehtu Dayana Yastremska a hmachhawn leh ang.