Hnehna nen Nadal a lo kir

Rafael Nadal chu a inkhelh thiamna clay court-ah a inlar leh thei ta. Spanish star hian Nilaini zan khan inkharkhip hnua a match hmasa ber a khel a, a khingpui Pablo Carreno Busta chu 6-1, 6-1 a sawpin Italian Open last 32-ah hnehna a chang.

World number 2 Nadal hian coronavirus avangin US Open a khel lo a, season tir lama khelh ṭhin clay court season hman theih a nih loh avangin nikuma French Open aṭanga ni 465 a liam hnuah clay court tournament hi a khel leh chiah a ni.

Kum 34 mi Nadal chuan, "Hrileng kara ka inkhel leh thei ta hi a lawmawm hle, chutihrualin tun hma lama boruak nuam leh muanawm tak ang kha chu a la ni chiah lo deuh," tiin a sawi. Nadal hian service a hloh loa a, a khingpui service vawi nga a chhuhsak thung.

Inkhel dangah world number 1 Novak Djokovic pawhin harsatna a tawk lo. Seeded pakhatna hian Salvatore Caruso chu 6-3, 6-2 in a hneh a, US Open aṭanga paihthlak a nih hnuah a thiam a la theihnghilh chuang lo.

Inkhel dangah wildcard hmanga inlan Jannik Sinner chuan beisei loh tak maiin Stefanos Tsitsipas 6-1, 6-7(9), 6-2 in a hneh. Italian player hian a match lehpekah chuan Yoshihito Nishioka 6-1, 6-0 a hnehtu Grigor Dimitrov a hmachhawn leh ang.