Neymar hrem hlanin PSG an chak ve ta

Hun rei tak French football thunun tawhtu Paris St-Germain-in an league match hmasa pahniha goal khung loa an tlawm hnuin point thum an hlawh chhuak ve ta a, an mikhual Metz chu 1-0 in an hneh - goal awm chhun hi injury time-a Julian Draxler-a thun a ni.

Metz an hmachhawn hmaa an match-a Marseille nen an inkhelh ṭuma defender Alvaro Gonzalez kutthlaktu Neymar chu hrem a nih vangin he inkhelah hian a inlan lo. 

Parc des Princes-a inkhelah hian PSG defender Abdou Diallo chu minute 65-naah hnawhchhuah a ni a, hetihlai hian goal-a la luh loh bawk si avangin tlem zawk nichunga khel PSG hi an chak zo lo leh mai dawnin a lang hman.

Mahse, hun pek belh minute thumnaah chhuak tur anga sawi thawm awm reng Julian Draxler a inlan a, German midfielder hian mualphona lak ata a team a chhanhim. 

Tun thlatira PSG player, Covid-19 kai pasarih zinga tel goalkeeper Keylor Navas, defender Marquinhos leh striker Mauro Icardi-te pawh an dam hnuah PSG jersey hain an inlan leh tawh a, Metz an hmachhawn. 

Mahse, PSG-in player hlawh hnem rual leh ṭha zawk an kawl chungin Metz lakah goal an khung thei lawk lo a, hun tawp nan minute 25 lai a la awm tihin Diallo chu hnawhchhuah a ni bawk. 

Kum 24 mi defender hian Metz forward Ibrahima Niane kawr a pawh avangin a yellow card pahnihna hi a hmu a, hnawhchhuah a ni - Ligue 1-a an match hnuhnung pahnih aṭangin PSG-in red card pali an hmu tawh a, hemi hma an match hnuhnung 62-a red card an hmuh zat nen a inang!

PSG-in an match hmasa pahnihah an tlawm tih an hria a, theihtawp an chhuah. Mahse, a tlem zawk an ni miau a, kum 2010 hnua a vawi khat nan league match thum chhung a zawna tlawm mai thei dinhmunah an ding hman. 

Minute 90-a pel tawh a, tlarhmaa Icardi leh Angel di Maria-ten goal an pai tel lo. PSG an nguai ṭan a, chak beiseina a tlem - mahse, hun pek belh minute thumnaah Draxler-a rawn inlar a, chakna goal a khung!

Vawi tam Metz goalkeeper Alexandre Oukidja enchhintu Di Maria chuan goal khung ngei beiseiin shot a nei a, hei hi Oukidja chuan a lo dang per. Draxler-a ke bulah tak a tla a, a dang nawn tawh lo - October 2018 hnua Ligue 1-a goal a khung leh hmasak ber a ni.  

PSG himna chu Draxler a ni a, mahse coach Thomas Tuchel chuan Arsenal leh Leeds United nena sawizawm midfielder hma hun hi chiang taka sawi theih a nih loh thu a sawi. 

German coach chuan, "Foot-ball-ah chuan engmah sawi lawk theih a ni lo a, transfer inhawn lai chuan a tuk lawkah thil a danglam leh ṭhin avangin engmah tiam theih a ni lo," a ti. 

Pathianni zan khan Marseille leh PSG inkhelh ṭumin buaina a chhuak a, Brazilian forward Neymar chuan Marseille defender Alvaro Gonzalez chu kut thlakin hnawhchhuah a ni. 

Neymar chuan Alvaro hi vun rawng inhmuhsitna lam hawia a ṭawng avanga kut thlak a nih thu a sawi a, inkhelah hian Neymar bakah PSG defender Layvin Kurzawa leh midfielder Leandro Paredes-te chu hnawhchhuah an ni a, Marseille lamah left back Jordan Amavi leh striker Dario Benedetto-te hnawhchhuah an ni bawk. 

French professional football enkawltu Ligue de Football Professionnel (LFP) chuan Neymar hi match hnih khel thei lo turin an hrem a, Kurzawa hi match ruk atan hrem niin Paredes chu Neymar ang thoin match hnih atan an hrem. 

Marseille lamah Amavi chu match thum khel thei lo tura hrem a ni a, Benedetto chu match khat atan hrem a ni bawk. Hetihlai hian Angel di Maria chu Gonzalez chil a chhak khum avangin September 23-a LFP disciplinary commission meeting hmachhawn turin koh a ni. 

Ligue 1 thuneitute hian Neymar hi hrem mah se vun rawng inhmuhsitna lam hawia chea Marseille defender Alvaro Gonzalez-a puhna erawh an chhui dawn a, Brazilian forward hian video assistant referee hmang pawha thil thleng hi en let theih a nih thu a lo sawi tawh. 

Hetihlai hian Gonzalez erawh chuan Neymar-a'n chi inthliarna lam hawia chea a puhna chu a pha a, a club Marseille chuan, "Alvaro Gonzalez hi chi inthliarna lam hawi lantir chi a ni lo a, he club-a zawm tirh aṭanga a nitin nungchang aṭangin kan hria a ni," tiin an chhan ve bawk. 

PSG chuan Neymar hi an thlawp tlat tur thu an lo sawi tawh a, Marseille nen an inkhelhnaa club pahnih buaina hian chanchin a la ngah dawn chauh niin a lang. 

Hetiang boruak ṭha lo karah hian PSG-in chanchin lawmawm an nei a, Covid-19 vanga season bul ṭan thei lo Kylian Mbappe chu Pathianni tlaia Nice nen an inkhelh hunah a lo kir theih a beisei thu coach Tuchel chuan a sawi.