Spurs-ah Bale-a chiang?

Tottenham Hotspur-a Gareth Bale kir tur thu chuan football khawvel titi a luah chhunzawm zel a, he thuziak i chhiar meuh chuan Welsh forward hian Spurs-ah contract a ziak fel tawh hial mai thei. 

Bale hian kum 2013 khan a hunlaia khawvel footballer manto ber ni turin Real Madrid chu Spurs aṭangin pound maktaduai 85-in a pan a, goal 100 chuang khungsaka Champions League nomawi pali a chawi hnuah Spurs-ah bawk a kir leh dawn ta niin a lang. 

Gareth Bale-a agent Jonathan Barnett chuan, "Kum sarih liam ta chhunga ṭum dang zawng ai khan Bale hian Real chhuahsan a hnaih tawh zawk a ni," tiin a sawi a, Bale-a chhuak ngei dawn. 

Wales international Bale hi loan-in nge, a nghetin a chhuah dawn, tih chu thil chiang lo langsar a ni a, hei pawh hi chiang vat tura beisei a ni.

Spurs manager Jose Mourinho chu Bale chungchang hi zawh a ni a, mahse Portuguese coach ṭawng ve duh tak chuan, "Real Madrid player a ni a, club dang player chungchang sawi a mawi lo. Club dang player an nihna hi kan zah ve tur a ni," a ti. 

Mahse, Mourinho hian Bale-a duh ṭhin thu erawh a pha lo a, Real Madrid boss hlui chuan, "Real ka enkawl lai khan lakluh ka tum a, mahse kan ti hlawhtling thei lo. Mahse, club President khan ka duhna leh hriatna chhawr ṭangkaiin Bale kha Real-ah a lalut a ni. 

"Hei hi thuruk a ni hran lo a, Gareth pawhin chu chu a hrechiang a ni," a ti a, Real-a Bale khelh theih chhan a nih thu a sawi - Portuguese manager hi Bale lakluhna kawngah a thawh hlawk hle nia sawi a ni a, September khan striker thar an lakluh ngei tur thu a lo sawi tawh bawk. 

Mourinho chuan, "Bazar turin kar thum hun kan la nei a, a eng zawng pawha thil thleng thei reng a ni. Football-ah chuan thil thleng turin nghah a ngai ṭhin a, kan chunga lo thleng tur chu i nghak phawt mai ang u," a ti!

Kum 31 mi Bale hian July 2019 khan Chinese Super League club Jiangsu Suning a zawm ṭep a, Real Madrid-in an rilru an thlak thut avangin kar khata pound maktaduai khat hlawhtir huamtu club hi a zawm ta lo. 

Real Madrid-a hlawh hnem ber Bale-a'n Spurs a pan chungchanga zawhna langsar tak chu a hlawh chungchang a ni a, London club hian Bale-a hlawh tur hi an pek theih ring lotu an tam zawk. 

Mahse, khawthlang media-ten an tarlan dan chuan Bale hian kum khatah pound maktaduai 13 lawih a hlawh dawn a, a hlawh ṭhenkhat hi Real Madrid-in an la tum ṭhen dawn bawk. 

Zinedine Zidane-a'n Bale-a chhawr duh miau loh avangin a hlawh pumpui pea chhawr duh loh player kawl reng ai chuan a hlawh ṭhenkhat tum chunga club danga kaltir hi thutlukna dik zawk niin a lang. 

Spurs-in Bale lak let an tumnaah Dele Alli hming a lo lang ve a, English midfielder hi Real Madrid chuan loan-in season khat chhung atan an lalut ve dawn thung nia sawi a awm. 

Mahse, thuthar berah chuan Alli a chhuak dawn lo a, Bale chungchanga Spurs leh Real indawrna chungchangah a hming lam rik a ni lo - kum 24 mi midfielder hi Spurs-ah a cham ngei dawn niin a lang. 

Tottenham hian Real Madrid left back Sergio Reguilon an lalut dawn bawk a, Nilaini zana engkim ching fel tawh hial anga an sawi player hian medical chauh a hmabak tawh avangin he thuziak i chhiar meuh chuan Spurs player a ni tawh hial mai thei. 

Kum 23 mi defender hian Spurs-ah medical a paltlang a nih chuan kum nga chhung contract a ziak dawn niin khawthlang media-te chuan an tarlang a, a man hi pound maktaduai 27 vel a ni bawk ang.