Rashford-a'n Villa zawm

Aston Villa chuan Manchester United aṭangin loan hmangin Marcus Rashford an lalut. Kum 27 mi English forward hian season tawp thleng Villa Park-ah a awm ang a, club pahnih inremnaah Villa hian pound maktaduai 40 a lei theih dan a awm bawk.

Rashford hian kar khatah £325,000 a hlawh a, Villa hian loan fee chawi lo mah se a hlawh 75% an pe. English forward hi a khel ṭha a, an hmachhawp angte a phak a nih phei chuan Villa hian a hlawh 90% an pe dawn.

Man United academy chhuak Rashford chuan, "Man United leh Aston Villa chungah loan a hlawhtlin theih avangin ka lawm hle. Club min dawrtu an awm ve nek nek a, Villa sawmna pawm erawh thutlukna awlsam a ni.

"Villa hi ka dah sang a, tun season-ah pawh an khel ṭha a, an manager-in tum sang tak a nei bawk. Football khelh ka duh a, ka khel thei tur hi ka lawm. Season khelh hma bakah Manchester United duhsakna sang ber ka hlan e," tiin a sawi.

Tun nipui bazarah Man United-in loan hmangin Antony an chhuah tawh a, loan hmang bawkin Rashford an chhuah. Ruben Amorim-a hote hian he thuziah lai hi chuan forward pahnih thlakna tur hi an la lut lo.

Unai Emery hote hian February 9, Pathianni zan dar 11:05 hian FA Cup-ah Tottenham an mikhual dawn a, Rashford hi inlan nghal thei dinhmunah a ding. Villa hian Champions League an khelh bawk avangin Rashford hian Europe-a inelna sang ber a khel thei bawk dawn.

Aston Villa hian Spain midfielder Marco Asensio pawh loan hmangin Paris St-Germain aṭangin an lalut hnai. Inrinni khan Wolves lakah 2-0 in an tlawm a, inkhelh banah Unai Emery-a'n player thar an mamawh thu a sawi.

January thlaah Rashford hma hian Levante aṭangin Spanish full-back Andres Garcia leh Borussia Dortmund aṭangin forward Donyell Malen an lalut. Chutihrualin Villa hian Colombia striker Jhon Duran chu Al-Nassr-ah pound maktaduai 71-in an hralh a, centre-back Diego Carlos chu Fenerbahce pound maktaduai 8.4-in an hralh bawk.