Brighton-in striker thar nei

Premier League club Brighton & Hove Albion chuan German club Nuremberg aṭangin forward Stefanos Tzimas an la lut a, kum 19 mi Tzimas la lut tur hian euro maktaduai 25 an inseng.

Greece Under-21 international hian June 2030 thleng Brighton tana khel turin contract a ziak a, mahse, season tawp thleng German second division club-ah hian loan-in a khel leh phawt dawn a ni.

Thessalonika tlangval Tzimas hian season hman mekah Nuremberg tan inelna hrang hrangah match 18 khelin goal 10 a khung tawh a, assist vawi hnih a nei.

Brighton tan Tzimas hi tun thlasik transfer-a an player lakluh pathumna a ni a, Greek forward hma hian Paraguay midfielder Diego Gomez (£14mtd) chu Major League Soccer club Inter Miami aṭangin an la lut a, defender Eiran Cashin chu Championship club Derby County aṭangin £9mtd-in an la bawk.