Spain-ah Antony a tlangnel nghal

Manchester United-a beisei phak lo, loan-a Real Betis pantu Antony chu Spanish La Liga-ah a tlangnel nghal hle - Pathianni zan khan Spanish football-a a match hmasa ber a khel nghal a, man of the match-ah thlan a ni.

Betis hian Athletic Bilbao an mikhual a, Isco leh Romain Perraud hmangin vawi hnih ngawt hma an hruai a, mahse, Bilbao hian Aitor Paredes leh Oihan Sancet hmanga si phurh sutin, 2-2 in an inhnehtawk.

Antony hian inkhel bul ṭanin, minute 72-naah lakchhuah a ni - Isco goal khung hi Antony shot per aṭanga lut a ni a, a khelhpuite goal hmaah hriam hret se, assist tam zawk nei thei tur a ni.

Real Betis manager Manuel Pellegrini chuan, "Bul ṭan dan duhawm tak a ni a, player quality tak a ni tih ka hria. Inkhelh hma lawk khan ka titipui a, player ṭha chuan a skills a pholan fo a ngai kher lo.

"Mahse, game ṭha tak khelin, tihsual nei tlem se, goal, pass ṭha leh cross ṭha tak nei se, a tawk mai. Zanin kan inkhelah a ṭangkai hle - kan zinga a awmna a la rei lo a, a la ṭangkai dawn chauh a ni," a ti.

Antony hian Kum 2022 nipui lai khan Ajax aṭangin Betis hi pound maktaduai 82-in a zawm a, match 96 khelhsakin goal 12 a khung. A man phu ang tawkin a khel chhuak lo a, season tawp thleng loan-a khel turin Betis hi a pan.