Liverpool-ah Alcantara a lut dawn

Premier League champion Liverpool chuan Bayern Munich aṭangin Spanish midfielder Thiago Alcantara an lalut dawn ta a, German club nen hian Thiago man atan pound maktaduai 20-in an inrem - a khelh ṭhat dan a zirin a man hi pound maktaduai nga dang an pek belh leh ang a, kum li chhung cham turin contract a ziak bawk ang.

Barcelona aṭanga bul ṭantu Thiago hi David Moyes-a'n Manchester United-a enkawl tirh khan Premier League khel turin lakluh a lo tum tawh a, mahse Bayern Munich lamah a kal.

Germany-ah hlawhtlinna changin Bundesliga-ah a zawnin vawi sarih an champion a, German Cup (1) leh Club World Cup (1) nomawi a chawi a, season hman zawh takah khan Champions League nomawi chawiin treble champion an ni. 

Kum 29 mi Thiago hian Bayern-ah kum khat dang contract la nei mah se a contract neihlai hi pawhsei a tum loh avangin German club hian man neia a chhuah theih laia chhuahtir hi an pawi ti lo a, an chhuahtir ta a ni.

Liverpool hi nipui transfer-ah an reh hle a, Thiago lalut tura inremna an neih hma hian Greece left-back Kostas Tsimikas chu pound maktaduai 11.7-a lalutin tun transfer-a an player lakluh awm chhun a la ni rih.