Copa America Messi leh Argentina tan fiahna
Captain Lionel Messi-a hoin Argentina chuan naktuk zing dar 5:00 hian Estadio Municipal de Concepcion-ah Paraguay an hmachhawn dawn. Copa America 2015 semifinal a inkhel tur ram pahnih te hi Group B-ah awm dunin an game hmasa berah si hnih ve ve khungin an lo inhnehtawk tawh.
An inkhelh hmasak ṭum hian Argentina hian first half-ah goal hnih khung mah se Paraguay hian second half-ah an sut leh thei. Heivang hian final lut zawk tur rinthiam a harsa hle.
Hetihlai hian Argentina hian tun hnaia Paraguay nen an inkhelh pali aṭangin vawi thum hnehna an chan bakah vawi khat an inhnehtawk pui a, result hlui aṭang hi chuan an chungnung zawk.
Argentina manager Gerardo Martino hian attacking player ṭha rual nei chungin an game hnuhnung berah Colombia lakah goal an khung lo a, penalty shootout aṭangin hnehna an chang hram.
Amaherawhchu, Martino hian hnuhma a nei chhe rih lo hle a, inkhel vawi 12 a kaihhruai tawh aṭangin vawi kua hnehna chan puiin vawi khat chu a inhnehtawk pui a, vawi hnih erawh an tlawm thung.
Argentina leh Messi
Barcelona super star Messi hian a club tan nomawi chawi theih zawng zawng chawi kim vekin mimal chawimawina zawng zawng dawng vek tawh mah se an ram tan nomawi ala chawi lo thung.
Kum 28-a upa forward hian ram tan game 101 khel tawhin goal 46 a khung tawh, ani aia goal khung tam awm chun chu goal 56 khungtu Gabriel Batistuta chauh a ni. An ram mipui atchilh gaol 34 khungtu Diego Maradona aiin khung tam tawh mah se nomawi a la hawn loh avangin sawisel tu an awm reng.
Nikum FIFA World Cup final-ah Germany lakah vanduai mah se Messi tan chuan tun hun hi an ram tan thil ropui a tih theihna hun ṭha a ni ang. Player ropui Messi hian nomawi a hawn thei dawn em tih chu kan hmu thuai dawn e.