Boca-ah Tevez a kir
Argentina striker Carlos Tevez chuan Italian champion Juventus chhuahsanin a football hum hman ṭanna Boca Juniors-ah a kir leh ta.
Kum 31-a upa Tevez hian kum 2005 khan Corinthians chhuahsanin Europe-ah inkhel turin a kal. Rin loh tak maiin Premier League club West Ham-ah a lut, hemi hnu hian Manchester United, Manchester City leh Juventus-ah te a khel zui leh bawk. Season hmasa khan Serie A-ah goal 20 khungin Juventus hi kum zawnin a champion a pui a, Bianconeri hi Coppa Italia a chawi pui bawk.
Copa America khel mek Argentine striker hi Liverpool, Atletico Madrid leh Paris St-Germain te nen sawi zawm mek ni mah se, kum kua zet Europe-a a inkhelh kual hnuah a chawr chhuahna ngaia kir leh a duh zawk a ni. Juventus hian an striker thlaktu tur hian Atletico aṭangin Mario Mandzukic an lo la lut tawh nghe nghe.
Premier League a khelh laiin Tevez hian League nomawi vawi thum a chawi a, division hniama tla tur West Ham a chhanhim bawk.
South American Player of the Year atana ṭum thum ngawt an thlan tawh Tevez hian Inrinni zing khan an ram tan Colombia lakah penalty aṭangin chakna goal a khung.