Wenger-a hnuaia keeper 16-na tur Petr Cech?

Kum 1996 aṭangin Arsene Wenger-a'n hlawtling takin Arsenal a enkawl a, French manager hnuaiah keeper 15 an awm tawh. Chung zingah chuan English keeper David Seaman leh German keeper Jens Lehmann te chiah hlawtling tiha chhal ngam an ni.

Wenger-a hnuaia keeper 16-na ni turin Chelsea keeper Petr Cech-in Arsenal a zawm hmel a, mimal contract chungchang an inbe fel tawh a, player man chungchangah club pahnihin inremna an hnaih tawh bawk.

Cech hian Belgium keeper Thibaut Courtois a tluk loh avangin starting eleven a chang pha lo. Amaherawhchu kum 33-a upa Cech hi Jose Mourinho thlan loh zawk a nih avangin dah hniam theih a ni lo.

Mourinho-a'n a hlau

Portuguese manager Mourinho hian Czech keeper hi a hre chiang a, a elpui club-a awm lo turin a duh. 'The Special One' hming lem invuah ngam Mourinho hian Cech hi French club Paris St Germain zawm turin a duh a, amaherawhchu veteran keeper hian chhungkaw thil vangin London club tana khelh a duh thung.

Chelsea neitu Roman Abramovich-a'n veteran keeper Cech hi a chhan a, kum 11 chhunga club tana a khelh ṭhat avangin a duhna club zawm phalna a pe a, Arsenal an vanneih phah. Mourinho chuan a hmalam hun thlir ranin ngaihdan a siam a, Abramovich erawhin mihring inzahtawhna ngai pawimawh chungin thutlukna a siam thung.

Mourinho ngaihdan hian Czech keeper hi a ṭha tih a nemnghet a, Arsenal tan chuan veteran keeper an la lut tur hi chanchin ṭha a ni.

Record nei ṭha

Cech hi feet ruk leh inches ngaa sang a ni a, Chelsea a zawm hma hian Chmel Blsany, Sparta Prague leh Rennes tan a khel tawh. An ram Czech Republic chu kum 2002 khan European U21 Championship-ah a champion pui a, best player-a thlan a ni.

Czech senior team tan vawi 114 a khel tawh a, amah aia khel tam chu Karel Poborsky (vawi 118) chiah a awm.

Cech hian kum 2004 khan Chelsea a zawm a, London club hi Premier League leh FA Cup-ah vawi li ve ve a champion pui a, League Cup-ah vawi thum a champion pui a, UEFA Champions League leh UEFA Europa League-ah vawi khat ve ve a chmapion pui bawk.

Premier League-ah Cech hian match 313 a khelh tawhah clean sheet vawi 150 zet a nei a, David James chiah a pha lo. English keeper hian clean sheet vawi 169 a nei a, amaherawhchu match 572 lawih a khel thung.

Cech hian Arsenal keeper ropui David Seaman (344 matches/142 clean sheet) bakah Manchester United keeper hlawhtling Edwin van der Sar (313/132) leh Peter Schmeichel (310/129) te aiin record a nei ṭha zawk.

Cech Vs Szczesny/Ospina

Petr Cech chian hma khan David Seaman chuan, "Arsenal-in keeper an la lut belh a nih chuan Ospina hian 2nd choice nih a duh dawn lo a, Szczesny-a'n a duh bik ka ring lo bawk," tiin a lo sawi tawh a. Arsenal keeper hlui hian Cech a dahsan thu a sawi tel bawk.

Season hman zawh takah khan Premier League-ah Arsenal tan David Ospina vawi 18 a inlan a, Wojciech Szczesny-a'n vawi 17 a inlan ve bawk. Wenger hian Cech a lak luh chhan hi a keeper neihsate a rin tawk loh vang tih a chiang, first keeper tur chu Cech-ah a ngaih theih.

Copa America-a Colombia tana khel ṭha tak kum 26-a upa Ospina hian club dang a zawn mai a rinawm a, kum 25-a upa Polish keeper Szczesny hian Cech chhuah hnu thlir ranin second keeper-ah a lungawi thei thung.

Cech tan chona thar

Wenger-a'n kum 2003-a Lehmann a lak luh khan kum 34 a ni tawh a, chutichung chuan season nga chhung hlawhtling takin a la khel thei. Arsenal keeper hlawhtling ber Seaman erawh kum 27 a nihin Gunners a zawm a, kum 13 chhung rinrawl a ni.

Chelsea-in tun dinhmunah hmalam hun an thlir vang chauhin Courtois an ring zawk a, amaherawhchu Blues keeper ropui ber chu Cech a ni tho tho. Veteran keeper hian Chelsea tana a sulhnu hi Arsenal-ah a chhawm tel thei lo, Gunners tana hming chher turin field chhungah a thawhchhuah a ngai dawn. A hna hmasa ber chu Arsenal no. 1 nih a ni a, chumi zawhah chuan Arsenal legend Seaman leh Lehmann te elpha tura record ṭha neih a ni.